" کڕینی فڕۆکە لە ئەمریکا یەکسانە بە مانەوەی هێزەکانی ئەمریکا لە عێراق"

ئاڤا نیوز  

ئەندامێکی لیژنەی ئاسایش و بەرگری لە ئەنجوومەنی نوێنەرانی عێراق پێیوایە سەرکەوتنی گرێبەستی کڕینی فڕۆکە لە ئەمریکا، پەیوەستە بە بەردەوامی کارەکانی هاوپەیمانی نێودەوڵەتی لە عێراق، هاوکات بەردەوامبوونی سەربازی ئەمریکا لە عێراق.

بۆچی گرنگە: بە گوتەی سەرۆکوەزیرانی عێراق هێزەکانی ئەمریکا لە عێراق کشاونەتەوە، جگە لە ڕاوێژکارانی سەربازی و تەکنیکی هیچ هێزێکی شەڕکەر لەسەر خاکی عێراق نەماوە تاوەکو قسە لەبارەی کشانەوەیان بکەن.

لێدوانی فەرمی: "واشنتۆن هێشتا بە ڕێژەی 80٪ کۆنتڕۆڵی بەسەر دۆسیەی پڕچەککردنی عێراقەوە هەیە، ئەمەش وادەکات کاردانەوەی نەرێنی هەبێت، بۆیە دەبێت عێراق پشت بە سەرچاوەی هەمە چەشن ببەستێت بۆ ئەوەی ئەمە نەبێتە کارتێکی گوشار بەدەست واشنتنەوە بەرامبەر بە بەغدا". یاسر وەتوت، ئەمەی بە میدیای عێراق گوت.

زانیاریی زیاتر: "دەستبەجێ لە دوای گەڕانەوەی شاندی عێراق لە ئەمریکا، میوانداری ئەو لایەنە دەکەین کە گرێبەستی کڕینی فڕۆکەی لەگەڵ لایەنی ئەمریکی کردووە، تاوەکو بزانین وردەکاری گرێبەستەکە و بەهاکەی چەندە و چ جۆرە فڕۆکەیەک لەخۆدەگرێت". یاسر وەتوت وا دەڵێت.

ئەمەش بزانە: باسم عەوادی، گوتەبێژی حکومەتی عێراق ڕایگەیاندووە: "دوای سەردانەکەی سوودانی بۆ ئەمریکا، بەغدا گرێبەست لەگەڵ واشنتن دەکات بۆ کڕینی 41 فڕۆکە".