شانەی ڕاگەیاندنی ئەمنی: تەقینەوەکەی بنکەی کالسۆ لە ڕێگەی فڕۆکەوە نەبووە

ئاڤا نیوز  

شانەی ڕاگەیاندنی ئەمنیی عێراق، لەبارەی "تەقینەوە"ـی بنکەی کالسۆ لە بابل ئاماژە بەوە دەدات، پێش تەقینەوەکە و لە کاتی تەقینەوەکەدا هیچ چالاکییەکی ئاسمانی لە سەرانسەری پارێزگاکەدا نەبووە.

چیرۆکی سەرەکی: شەوی ڕابردوو ناوەندی سەربازیی کالسۆ، کە تایبەتە بەهێزەکانی حەشدی شەعبی، لەباکووری شاری بابل بۆردوومانکرا و دەنگی چەند تەقینەوەیەکی بەهێزیش بیسترا. 

ڕاگەیێنراوی فەرمی: بەپێی ڕاگەیێنراوی شانەی ئەمنیی عێراقی، لە ڕووداوی تەقینەوە و ئاگرکەوتنەوەکەی شەوی ڕابردووی بنکەی کالسۆ لە باکووری پارێزگای بابل، کە بارەگای کەرتەکانی سوپا و پۆلیس و دەستەی حەشدی شەعبی لەخۆدەگرێت، بەهۆیەوە ئەندامێکی دەستەی حەشدی شەعبی کوژرا، هاوکات هەشت کەسی دیکە برینداربوون، کە لەنێویاندا کارمەندی سوپا هەن".

زانیاریی زیاتر: شانەی ڕاگەیاندنی ئەمنی ئاماژە بە ڕاپۆرتی بەرگریی ئاسمانیی عێراق دەکات، "پێش تەقینەوەکە و لە کاتی تەقینەوەکەدا هیچ چالاکییەکی ئاسمانی لە سەرانسەری پارێزگاکەدا نەبووە، لەسەر ڕووداوەکەش لیژنەیەکی تەکنیکی لەبارەی هۆکاری تەقینەوەکە پێکهێنرا".

 

لەلایەکی دیکەوە: دوای تەقینەوەکەی شەوی ڕابردووی ناوەندی سەربازیی کالسۆ، هەریەک لە ئەمریکا و ئیسرائیل لەلایەن خۆیانەوە ڕەتیانکردەوە پەیوەندییان بەو ڕووداوەوە هەبێت و هیچ هێرشێکیان لە خاکی عێراق کردبێت.