وەزارەتی تەندروستی ڕێكلام بۆ شیر و تەواوكەری خۆراكی قەدەغە دەكات

ئاڤا نیوز

وەزارەتی تەندروستی چەند بڕیارێک لە بەرژەوەندیی هاووڵاتییان دەردەکات، یەکێک لە بڕیارەکان ئەوەیە ڕێکلام بۆ شیر و تەواوکەری خۆراکی قەدەغە دەکرێت.

لێدوانی فەرمی: لە پێناو بایەخدان بە خزمەتگوزاریی چاودێریی بەرایی تەندروستی بە تایبەت چاودێریی دایکایەتی و منداڵان، بە مەبەستی ڕێکخستنی کاری کۆمپانیاکان کە ڕێکلام بۆ تەواوکەری خۆراکی تایبەت بە منداڵانی تەمەن (یەک تا 10)ساڵی دەکەن بڕیارمان دا کە هاوشێوەی شیری منداڵان مامەڵەی لەگەڵ بکرێت.  د.سامان بەرزنجی وەزیری تەندروستیی حکومەتی هەرێمی کوردستان وای بە ئاڤا نیوز گوت. 

زانیاریی زیاتر: بەپێی بڕیارەکانی وەزارەتی تەندروستی حکومەتی هەرێمی کوردستان پێویستە کارمەندانی نەخۆشخانەکانی لەدایکبوون و سەنتەرەکانی کوتان، ڕێنوێنی دایکان بکەن تاوەکو شیری دایک بدەن بە کۆرپەکانیان، هەروەها قەدەغەیە هیچ جۆرە شیرێک یان تەواوکەری خۆراکی لە نەخۆشخانەکانی لەدایکبوون و بنکە تەندروستییەکان بدرێتە هاووڵاتیان. 

ئەوەی پێویستە بیزانیت: بەپێی بڕیارەکانی وەزارەتی تەندروستی، بوونی "نوێنەری کۆمپانیاکان" لە نەخۆشخانەکانی حکومی و ناحکومی، سەنتەرەکانی کوتانی منداڵان و هەر دەزگایەکی تەندروستی و رێکلام کردن بۆ شیر یان تەواوکەری خۆراکی بە هەموو شێوەیەک قەدەغەیە، هەر پزیشکیک یان کارمەندێکی تەندروستی یان فەرمانبەرێک، ڕیکلام بۆ هەر کۆمپانیایەک بکات، ڕێکاری یاسایی تووندی بەرامبەر دەگیرێتەبەر.

بۆچی گرنگە: بڕیارەکەی وەزارەتی تەندروستی ڕێگە دەگرێت، لە ساغکردنەوەی شیری ناتەندروست و تەواوکەری خۆراکی لە نەخۆشخانە و دەزگا تەندروستییەکان.