ئەنجوومەنی وەزیران لەبارەی دابەشکردنی مووچەی مانگی چوار و گەڕاندنەوەی پێشینەکان کۆ دەبێتەوە

ئاڤا نیوز 

 

ئەنجوومەنی وەزیرانی هەرێمی کوردستان لە کۆبوونەوەی ئاسایی ئەمڕۆ چوارشەممە و گفتوگۆ لەبارەی چەند بابەتێک دەکات، یەکێک لەوانەش ئامادەکارییە بۆ دابەشکردنی مووچەی مانگی چوار و گەڕاندنەوەی پێشینەکانە.

 

ئەوەی پێویستە بیزانیت: ڕۆژی چوارشەممە، 24-04-2024 ئەنجوومەنی وەزیرانی هەرێمی کوردستان، بە سەرپەرشتیی سەرۆکوەزیران بارزانی و ئامادەبوونی قوباد تاڵەبانی ـ جێگری سەرۆکوەزیران کۆ دەبێتەوە.

 

زانیاریی تایبەت: کۆبوونەوەی ئەنجوومەنی وەزیران لە دوو بڕگە پێک دێت، بڕگەی یەکەمی تایبەتە بە گفتوگۆکردن لەبارەی ڕاپۆرتی هاوبەشی وەزارەتی دارایی و ئابووری و شاندی دانوستانکار سەبارەت بە ئامادەکارییەکان بۆ مووچەی مانگی نیسان و داڕشتنی میکانیزمی پێویست بۆ جێبەجێکردنی پابەندییەکانی حکومەتی هەرێمی کوردستان لە بواری داهاتەکان و بە بانکیکردنی پێدانی مووچە، بە گوێرەی دەستوور و یاسای بودجەی فیدراڵ و یاسای بەڕێوەبردنی دارایی فیدراڵ گفتوگۆ دەکرێت.

 

گۆشەیەکی دیکە: بڕگەی دووەمی کۆبوونەوەکە دوو خاڵ گفتوگۆ دەکرێن کە بریتین لە:

• 
  - چەند پێشنیارێک تایبەت بە ئاسانکاریی گەڕاندنەوەی پێشینەکانی بانکە پسپۆڕییەکان لای هاووڵاتییان وەک: خانووبەرە، کشتوکاڵی، نیشتەجێبوون، پیشەسازی، گەشتوگوزار، هاوسەرگیری، هەروەها قەرزی بانکە بازرگانییەکان و ڕێژەی سوودی بانکیی ئەم قەرزانە و ڕێکارەکانی وەرگرتنەوەیان بە پێی یاسای چاکسازی.
•  

- لە بڕگەی سێیەمدا دەنگدان لەسەر ڕەشنووسی پەیڕەوی پۆلێنکردنی بەڵێندەران و دانان لە لیستی بێبەشکردن لە بەشداربوون، تاوتوێ دەکرێت.