بە ئامادەبوونی نێچیرڤان بارزانی کۆبوونەوەی هاوپەیمانیی بەڕێوەبردنی دەوڵەت دەستی پێکرد

ئاڤا نیوز

 

بە ئامادەبوونی نێچیرڤان بارزانی، سەرۆکی هەرێمی کوردستان، کۆبوونەوەی هاوپەیمانیی بەڕێوەبردنی دەوڵەت لە بەغدا دەستی پێکرد و بڕیار وایە پرسی هەڵبژاردنی پەرلەمانی کوردستان تاوتوێ بکەن.

 

وێنە گەورەکە: ئەمڕۆ نێچیرڤان بارزانی گەیشتە بەغدا و ئەمە دووەم سەردانی سەرۆکی هەرێمی کوردستانە لەم مانگەدا کە هەردووکی تایبەتن بە پرسی هەڵبژاردنەکانی پەرلەمانی کوردستان.

 

زانیاری بەدەستهاتوو: لە کۆبوونەوەکەی بەڕێوەبردنی دەوڵەتدا پرسی ھەڵبژاردنی سەرۆکی ئەنجوومەنی نوێنەران و ھەڵبژاردنی پەرلەمانی کوردستان تاوتوێ دەکرێت.

 

ئەوەی پێویستە بیزانیت: ئەنجوومەنی نوێنەرانی عێراق لە کۆبوونەوەی هەڵگیراوی خۆیدا بۆ سبەی یەکشەممە تاوتوێی بڕگەی دانانی سەرۆکێکی نوێ بۆ ئەنجوومەنەکە دەکات، ڕەنگە کۆبوونەوەی بەڕێوەبردنی دەوڵەت پرسەکە یەکلا بکاتەوە.

 

بابەتە ستراتیژییەکە: پرسی هەڵبژاردنەکانی پەرلەمانی کوردستان تەوەرێکی دیکەی کۆبوونەوەکەیە کە بڕيارە 10ـی حوزەیران بەڕێوە بچێت، کۆتا هەڵوێستی پارتیش ئەوەیە بە بێ بەشداریی پێکهاتەکان بەشداریی هەڵبژاردن ناکات.