ڕاوێژکارێکی سوودانی: خشتەكانی بودجە بۆ ئەنجوومەنی نوێنەران دەنێردرێن

ئاڤا نیوز 

 

ڕاوێژكارێکی سەرۆكوەزیرانی عێراق ئەو دەنگۆیانە ڕەتدەکاتەوە کە باس لە نەناردنی بودجەی ساڵی 2024 بۆ ئەنجوومەنی نوێنەران دەکەن.

 

وێنە گەورەکە: دوێنێ ڕاوێژکارێکی دیکەی سەرۆکوەزیرانی عێراق ڕایگەیاندبوو کە بودجەی 2024 دەکەوێتە واری جێبەجێکردنەوە بەبێ ئەوەی خشتەکانی بۆ ئەنجوومەنی نوێنەران  بنێردرێت، لە بەرامبەردا ڕاوێژکارێکی دیکەی سوودانی ئەو لێدوانە ڕەتدەکاتەوە. 

 

لێدوانی فەرمی: مەزهەر محەممەد ساڵح، ڕاوێژكاری سوودانی بۆ كاروباری دارایی و ئابووری بە ئاژانسی هەواڵی عێراقی ڕاگەیاندووە: ئەو لێدوانانەی باس لە نەناردنی خشتەکانی بودجە دەکەن، بێبنەمان، جەختیشی كردەوە كە خشتەكانی بودجە لە حكومەتەوە بۆ ئەنجوومەنی نوێنەران دەنێردرێن، لە بەرامبەردا هەمواركردنەكان دەکرێن، لەکاتێکدا پێویستی بە یاسایەکی نوێ نییە. 

 

ئەوەی پێویستە بیزانیت: پێویستە پەرلەمان پێداچوونەوە بۆ بودجەی ساڵی 2024 بکات، چونکە هەندێک پڕۆژەی ساڵی ڕابردوو کۆتاییان هاتووە دەبێت لاببرێن، خشتەکانی بودجەش جێگیرنین لەبەر ئەوەی نرخی نەوت و داهاتەکانی حکومەت سەقامگیر نین، ژمارەی فەرمانبەران و خانەنشینانیش لە زیادبووندایە.