ناكۆكیی مالیكی و عامری لەسەر پۆستی پارێزگاری دیالە قووڵ دەبێتەوە

ئاڤا نیوز

ناكۆكیی نێوان لایەنە سیاسییەكانی عێراق بەتایبەتیش هادی عامری و نووری مالیكی، كاریگەری كردووەتە سەر دواخستنی یەكلاییكردنەوەی پۆستی پارێزگاری دیالە و دۆخی پارێزگاكەش.

چیرۆكی سەرەكی: لە چەند ڕۆژی ڕابردوودا لەنێو چوارچێوەی هەماهەنگیی دابەشبوونێكی گەورە درووست بووە، بەتایبەتیش دوای تووندبوونەوەی كێبڕكێكان لەنیوان هادی عامری و نووری مالیكی لەسەر پۆستی پارێزگاری دیالە، هەردوولاش دەستوەردانی محەممەد شیاع سوودانی سەرۆكوەزیرانی عێراقیان لە بابەتەكە ڕەت كردووەتەوە.

ئەوەی پێویستە بیزانیت: بەگوێرەی ئەو زانیارییانەی بەشێك لە میدیا عێراقییەكان بڵاویان كردووەتەوە، عامری بە مالیكی گوتووە: دیالە پشكی بەدرە بەهیچ شێوەیەك سازشی لەسەر ناكەین.

زانیاریی زیاتر: عامری دەستبەرداری موسەننا تەمیمی نابێت و دانووستانیش لەسەر پێشنیازكردنی هیچ ناوێكی دیكە ناكات، نوری مالیكیش عەبدولڕەسول جەدعانی پێشنیاز كردووە بۆ وەرگرتنی پۆستی پاریزگار، لایەنە سونییەكانیش ڕەعد دەهلەكییان بەربژێر كردووە.

وێنە گەورەكە: زیاتر لە پێنج مانگە ئەنجامی هەڵبژاردنی ئەنجوومەنی پارێزگاكان ئاشكراكراون، بەڵام لایەنە سیاسییەكان سەركەوتوو نەبوون لەسەر ڕێكەوتوون بۆ دیاریكردنی كەسێك بۆ پۆستی پارێزگاری دیالە.