کارەکانی نۆژەنکردنەوەی ڕێگەی شکارتە - بالیسان دەستیپێکردووەتەوە

ئاڤا نیوز

دوای حەوت مانگ وەستانی کارکردن لە پرۆژەی قیرتاوکردنی ڕێگەی شکارتە - بالیسان، کارەکانی پرۆژەکە دەستیپێکردووەتەوە بڕیارە لە دوو قۆناغدا کارەکان تەواوبکرێن.

بۆچی گرنگە: ڕێگەی شکارتە - بالیسان بە یەکێک لە رێگە ستراتیژی و بازرگانییەکان دادەنرێت، چونکە پارێزگای سلێمانی بە پارێزگای دهۆک و ئیدارەی سۆران بە ئیدارەی راپەڕین دەبەستێتەوە و رێگەی مەرزی کێلێ و حاجی ئۆمەران و باشماخە.

لێدوانی فەرمی: مەهدی مستەفا، بەڕێوەبەری ناحیەی بالیسان بە ئاڤا نیوزی گوت: "کۆمپانیای جێبەجێکار لە 16ـی ئەم مانگەوە دەستیان بە هەنگاوەکانی کارکردنیان کردووە، لە دوێنێ وە کارکردن دەستیپێکردووە و هاتووچۆی بارهەڵگر لە ڕێگاکە وەستێنراوە تاوەکو کۆمپانیای جێبەجێکار ئاسانتر و خێراتر کارەکانی بکات".

شێوازی جێبەجێکردن: درێژی رێگەکە (23.5کم)ـە  بە گوژمەی حەوت ملیار و 698 ملیۆن دینار لە قۆناغی یەکەم (14کم) قیردەکرێت و لە قۆناغی دووەم (9.5کم) قیر دەکرێت.