سوودانی جەخت لە بەڕێوەچوونی هەڵبژاردنی کوردستان بە بەشداریی پێکهاتەکان دەکاتەوە

ئاڤا نیوز

 

سەرۆکوەزیرانی عێراق جەخت لە بەڕێوەچوونی هەڵبژاردنی خولی شەشەمی پەرلەمانی کوردستان بە کۆدەنگی سیاسی و بەشداریی هەموو پێکهاتەکان دەکاتەوە. گوتەبێژی سەرۆکایەتی هەرێمی کوردستانیش دەڵێت " سەرۆکوەزیرانی عێراق تێگەیشتنێکی زۆر جوانی بۆ دۆخەکە هەبووە". 

 

ڕاگەیێنراوی فەرمی: بەگوێرەی ڕاگەیێنراوی فەرمیی نووسینگەی سەرۆکوەزیرانی عێراق، محەممەد شیاع سوودانی لەمیانی کۆبوونەوەی لەگەڵ عومەر ئەحمەد، سەرۆکی کۆمیسیۆنی هەڵبژاردنەکانی عێراق، جەختی لە گرنگی هەڵبژاردن لەژێر ڕۆشنایی کۆدەنگی سیاسی و بەشداریی هەموو پێکهاتەکان لەو پڕۆسەیە کردووەتەوە.

 

لێدوانی فەرمی: دڵشاد شەهاب گوتەبێژی سەرۆکایەتی هەرێمی کوردستان بە کوردستان حەسەن پەیامنێری دیپلۆماسی ئاڤا نیوزی گوت:" کاتێک سەرۆکی هەرێمی کوردستان پێشهاتەکانی دۆخەکەی بۆ سەرۆکوەزیرانی عێراق ڕوونکردووەتەوە تێگەیشتنێکی زۆر جوانی هەبووە".

زانیاریی زیاتر: بێبەشبوونی پێکهاتەکان کەموکوڕییەکی گەورەیە، دوای ئەو کۆبوونەوانەی سەرۆکی هەرێمی کوردستان، سەرۆکوەزیرانی عێراق لەگەڵ کۆمسیۆن دانیشتووە و ئەو بابەتانەی باسی کردوون ڕێک ئەو کێشە جەوهەرییانەن کە دەبێت هەنگاو بنرێت بۆ چارەسەرکردنی". دڵشاد شەهاب وای گوت.

 

وێنە گەورەکە: بەهۆی بڕیاری دادگەی فیدراڵی عێراق بۆ هەڵوەشاندنەوەی کورسیی کۆتای پێکهاتەکان لە پەرلەمانی کوردستان، پارتی و بەشێک لە لایەنەکانی هەرێمی کوردستان ناڕازین لە شێوازی بەڕێوەچوونی هەڵبژاردن و تێبینییان لەسەری هەیە.