سوودانی: هیچ جێگرەوەیەک نییە بۆ پاراستنی دەستوور و جێبەجێکردنی یاسا

ئاڤا نیوز

سەرۆکوەزیرانی عێراق جەختی لەسەر پێویستی "پاراستنی قسەی دەوڵەت، پاراستنی دەستوور و جێبەجێکردنی یاسا" لە عێراق دەکاتەوە.

 

لێدوانی فەرمی: محەممەد شیاع سوودانی، سەرۆکوەزیرانی عێراق ڕایگەیاند: وڵاتەکەمان بەرەو قۆناغی بەرهەمهێنان، بنیاتنانی ژێرخانی ئابووری، هاندانی ئابووری، ڕەخساندنی هەلی کار، ڕووبەڕووبوونەوەی ئاڵنگارییەکان و چەسپاندنی سەروەری هەنگاو دەنێت. سوودانی ئەو قسانەی لە میانی پێشکەشکردنی گوتارێک لە ڕێوڕەسمی 21 ساڵەی دامەزراندنی بزووتنەوەی عەسائیبی ئەهل حەق لە بەغدا کرد.

 

زانیاریی زیاتر: سوودانی ئاماژە بەوە دەکات، بەرپرسیارێتی جێبەجێکردنی یاسا، بنیاتنانی دادپەروەری، یەکسانی و سەقامگیری دامەزراوەیی لەسەر شانی هەموومانە و دەشڵێت: "هیچ جێگرەوەیەک نییە بۆ بەرز ڕاگرتنی قسەی دەوڵەت، پاراستنی دەستوور و جێبەجێکردنی یاسا لە وڵاتدا".