بڕیار لەسەر دیاریکردنی بڕی وەرگرتنی گەنمی جووتیارانی هەرێمی کوردستان دەدرێت

ئاڤا نیوز

ئەمڕۆ لە بەغدا تیمی وەزارەتی کشتوکاڵی هەرێمی کوردستان و عێراق، لەبارەی دیارکردنی بڕی وەرگرتنی گەنمی جووتیارانی هەرێمی کوردستان کۆدەبنەوە.

وێنە گەورەکە:دوێنێ وەزیری کشتوکاڵی هەرێمی کوردستان بە یاوەری شاندێک لەگەڵ سەرۆکوەزیرانی عێراق کۆبووەوە و وەرگرتنی گەنمی ئەمساڵی جوتیارانی هەرێمی کوردستان یەکێک بوو لە تەوەری کۆبوونەوەکە.

لێدوانی فەرمی: زۆزان کۆچەر، جێگری سەرۆکی لیژنەی کشتوکاڵ و ئاو لە ئەنجوومەنی نوێنەرانی عێراق بە ئاڤا نیوزی ڕاگەیاند: تیمێکی وەزارەتی کشتوکاڵی هەرێمی کوردستان لە بەغدایە و لەگەڵ تیمی کشتوکاڵی عێراق بۆ دیارکردنی بڕی وەرگرتنی گەنمی ئەمساڵی جوتیاران و ئامادەکاریی پلانی پرۆسەکە و کۆدەبنەوە، لەم ڕۆژانەدا بڕەکە دیار دەکرێت.

زانیاریی زیاتر: "ئێمە بە نووسراو داوامان کردووە ئەمساڵ هەموو بەرهەمی گەنمی جووتیاران وەربگیرێت و هاوشێوەی جووتیارانی ناوەڕاست و خواروی عێراق بەشێوەیەکی یەکسان بێت". زۆزان کۆچەر وا دەڵێت.

ئەوەی پێشبینی دەکرێت: ئەمساڵ بەھۆی بارینی ڕێژەیەکی زۆری باران، پێشبینی دەکرێت ڕێژەی بەرھەمی گەنم لە هەرێمی کوردستان لە ساڵی ڕابردوو زیاتر بێت، بگاتە نزیکەی دوو ملیۆن تۆن.