دڵشاد شەهاب: ئێران خواستێکی باشی پەرەپێدانی بەرژەوەندیی ئابووری لەگەڵ هەرێمی کوردستان هەیە

ئاڤا نیوز

 

گوتەبێژی سەرۆکایەتیی هەرێمی کوردستان ڕایدەگەیێنێت، ئاستی پێشوازی و ناوەڕۆكی گفتوگۆكان لەگەڵ بەرپرسانی ئێران سەلمێنەری پێگەی بەهێزی كوردستانن لە ناوچەكەدا.

 

وێنە گەورەکە: نێچیرڤان بارزانی؛ سەرۆکی هەرێمی کوردستان بە سەردانێکی سێ ڕۆژە لە تارانی پایتەختی ئێران بوو، لەگەڵ بەرپرسانی باڵای ئەو وڵاتە گفتوگۆی پەیوەندییە سیاسی، ئابووری و ئەمنییەکان کرا.

 

لێدوانی فەرمی: دڵشاد شەهاب، گوتەبێژی سەرۆکایەتیی هەرێمی کوردستان بە ئاڤا نیوزی ڕاگەیاند: "له‌ سەرجەم کۆبوونەوە و دیدارەکانی نێوان سەرۆکی ھەرێمی كوردستان و بەرپرسانی باڵای ئێران، په‌یوەندی دۆستانەی ئێران و عێراق بەگشتی و ھەرێمی کوردستان باس کراوە، ئێران مەبەستێکی باشی پەرەپێدانی بەرژەوەندیی ئابووری لەگەڵ هەرێمی کوردستان هەیە".

 

زانیاریی زیاتر: ئەو گوتەبێژە ئاماژەی بەوەش کرد، کۆبوونەوە لەگەڵ عەلی خامنەیی، ڕابەری شۆڕشی کۆماری ئیسلامیی ئێران، دیدارێکی زۆر گرنگ بوو و تایبەتمەندی خۆی ھەیە، چونکە ئەم دیدارانە بە دەگمەن ڕێک دەخرێن. 

 

بابەتی ستراتیژی: ھەزاران ھاووڵاتیی هەرێمی کوردستان بەرژەوەندییان لە ئێران ھەیە، دەیان کۆمپانیای ئێرانیش لە کوردستان وەبەرھێنان دەکەن و ھاتووچۆی بەردەوام لەنێوان ھەردوولادا ھەیە، لەم دەرچەیەوە پەرە بە پەیوەندییە ئابوورییەکان دەدرێت.