ڕێگەی بازرگانیی نێوان هەرێمی کوردستان و سێ وڵات ڕێک دەخرێتەوە

ئاڤا نیوز

 

لەسەر بودجەی پەرەپێدانی حکومەتی هەرێمی کوردستان ڕێگەی بازرگانیی ئالوکا - دێرکێ لە ماوەی زیاتر لە ساڵێک ڕێک دەخرێتەوە. 

 

چیرۆکی سەرەکی: ڕەزامەندی لەسەر چاککردن و ڕێکخستنەوەی هەردوو سایدی ڕێگەی نێوان ئالوکا - دێرکێ بەدرێژایی 15 کیلۆمەتر لە سنووری پارێزگای دهۆک دراوە.

 

لێدوانی فەرمی: محەمەد ڕەمەزان، سەرۆکی شارەوانیی فەیدییە بە ئاڤا نیوزی ڕاگەیاند: "لەسەر بودجەی پەرەپێدانی حکومەتی هەرێمی کوردستان، هەشت ملیار دینار بۆ نۆژەنکردنەوە و ڕێکخستنەوەی ڕێگەکە تەرخان کراوە و ماوەی 400 ڕۆژ دەخایێنێت".

 

بۆچی گرنگە؟ ڕێگەی ئالوکا - دێرکێ، ڕێگەیەکی ستراتیژیی بازرگانی نێوان هەرێمی کوردستان، تورکیا، عێراق و سووریایە و ڕێکخستنەوەشی کارئاسانی بۆ بارهەڵگرانی ڕێگەکە و زیادبوونی جووڵەی بازرگانی دەکات.