عێراق لەبارەی هێرشکردنە سەر ئەمریکا: پێشهاتەکان مەترسیدارن

ئاڤا دیجیتاڵ

لە کاردانەوەی هێرشەکەی سەر بنکەی سەربازیی ئەمریکا لە سنووری ئوردن و سووریا، حکومەتی عێراق رایدەگەیێنێت، بە نیگەرانییەکی زۆرەوە چاودێری پێشهاتە ئەمنییە مەترسیدارەکانی ناوچەکە دەکەن.

چیرۆکی سەرەکی: حکومەتی عێراق لە رگەیێنراوێکدا، هێرشکردنە سەر هێزەکانی ئەمریکا لە سنووری سووریا و ئوردن سەرکۆنە دەکات و بە پێشهاتێکی مەترسیداری دادەنێت.

لێدوانی فەرمی: باسم عەوادی، گوتەبێژی حکومەتی عێراق لە راگەیێنراوێکدا ئاماژەی بەوە داوە، پەرەسەندنە بەردەوامەکان سەرکۆنە دەکەن بەتایبەت هێرشەکەی سەر سنووری سووریا و ئوردن، بە نیگەرانییەکی زۆریشەوە چاودێری پێشهاتە ئەمنییە مەترسیدارەکانی ناوچەکە دەکەن.

زانیاری زیاتر: گوتەبێژی حکومەتی عێراق جەختیکردووەتەوە، لێکەوتەکانی ئەم پێشهاتانە هەڕەشەن بۆ ئاسایشی ناوچەیی و نێودەوڵەتی، رێگرن لە هەوڵەکانی رووبەڕووبوونەوەی تیرۆر و ماددەی هۆشبەر، کەرتی بازرگانی و ئابووری و دابینکردنی وزە دەخەنە مەترسییەوە.

باکگراوند: ئێوارەی رۆژی یەکشەممە 28-11-2024، بە فڕۆکەی بێفڕۆکەوان بنکەی  سەربازیی تەنەف کە تایبەتە بە هێزەکانی ئەمەریکا و سێ هەزار سەربازی لێن، له‌سه‌ر سنووری نێوان ئوردن و سووریا کرایە ئامانج، بەهۆیەوە سێ سەربازی ئەمریکی کوژران و 34 سەربازیش برینداربوون، بەرەی مقاوەمەی عێراقیش بەرپرسیارێتی هێرشەکەی لەئەستۆگرت.