گوتەبێژی حكومەتی هەرێمی كوردستان هۆكاری دەستپێنەكردنەوەی هەناردەی نەوت ئاشكرا دەكات

ئاڤا نیوز

گوتەبێژی حكومەتی هەرێمی كوردستان ڕایگەیاند، هەناردەی نەوت ئێستا بابەتێكی تەكنیكی نییە لە ڕووی تەكنیكییەوە تورکیا و عێراق ئامادەن بۆ دەستپێكردنەوەی هەناردەكردنی نەوت.

لێدوانی فەرمی: پێشەوا هەورامانی، گوتەبێژی حكومەتی هەرێمی كوردستان، لە كۆنگرەیەکی ڕۆژناماوانیدا ڕایگەیاند: "تورکیا و عێراق ئامادەن بۆ دەستپێكردنەوەی هەناردەکردنی نەوت، ئێستا كێشەكە تێچووی نەوتە هەرچەندە ڕێككەوتن كراوە، بەڵام ڕێككەوتنەكە جێبەجێ نەكراوە".

باکگراوند: ساڵێک پێش ئێستا بەهۆی سکاڵای عێراق لە دادگەی نێوبژیوانی پاریس، دادگەكە سزای یەک ملیار و 500 ملیۆن دۆلاری بەسەر تورکیادا سەپاند، بەوهۆیەوە هەناردەی نەوتی هەرێمی كوردستان ڕاگیرا.

وێنە گەورەکە: بە هۆی ڕاگرتنی هەناردەی نەوتی هەرێمی کوردستانەوە، ڕۆژانە بازاری وزەی جیهان نزیکەی 400 هەزار بەرمیل نەوت لەدەست دەدات، ئەمەش بووەتە هۆی بەرزبوونەوەی نرخی نەوت لە جیهان، جگە لەوەش زیانی 14.5 ملیار دۆلاری بە داهاتی عێراق گەیاندووە.