زۆرینەی حاجیيانی کوردستان بە وشکانی دەچنە سعوودیە

ئاڤا نیوز

 

بۆ بەجێگەیاندنی فەریزەی حەج، ئەمساڵ زیاتر لە دوو هەزار کەس بە ڕێگەی وشکانی سەردانی وڵاتی سعوودیە دەکەن.

وێنە گەورەکە: له‌ كۆتایی ئه‌م مانگه‌ یه‌كه‌م كاروانی حاجیانی هه‌رێمی كوردستان به‌ره‌و سعوودیه‌ به‌ڕێ ده‌كه‌وێت، چوار هەزار و  485 کەس لە هەرێمی کوردستان بۆ بەجێگەیاندنی فەریزەی حەج دەچنە سعوودیە.

لێدوانی فەرمی: کاروان ستوونی، گوتەبێژی بەڕێوەبەرایەتیی گشتیی حه‌ج و عومره‌ی هه‌رێمی کوردستان بە ئاڤا نیوزی گوت: "ئەمساڵ دوو هەزار و 460 کەس لە ڕێگەی وشکانی گەشتی وڵاتی سعوودیە دەکەن، لە کاتێکدا ساڵی ڕابردوو 690 کەس ئەو ڕێگەیان بۆ گەشتەکە بەکار هێناوە."

ئەوەی پێویستە بیزانیت: 27ـی ئەم مانگە دوو هەزار و 225 کەس بە فڕۆکە دەچنە وڵاتی سعوودیە کە تێچووی هەر یەکەیان شەش ملیۆن و 350 هەزار دینارە.  29ـی مانگیش گەشتی ئەوانە دەست پێ دەکات کە بە وشکانی سەفەر دەکەن و تێچووی هەر یەکێکیان پێنج ملیۆن و 300 هەزار دینارە.