عێراق دڵنیایی لە پاراستنی باڵیۆزخانەکان و سەلامەتیی ئەرکەکانیان دەدات

ئاڤا نیوز

 

بەڕێوەبەرایەتیی پۆلیسی پاراستنی باڵیۆزخانە و دیپلۆماتکاران لە عێراق، دڵنیایی لە پاراستنی باڵیۆزخانەکان و سەلامەتی ئەرکەکانیان دەدات و ڕایدەگەیێنێت، هەموو ڕێوشوێنێک گیراوەتەبەر بۆ ڕێگریکردن لە هێرشکردنە سەریان.

 

بۆچی گرنگە؟ لە ماوەی ڕابردوودا چەند جارێک هێرش کراوەتە سەر باڵیۆزخانەی وڵاتان لە عێراق، لەوانە هێرشی چەند خۆپیشاندەرێک بۆ سەر باڵیۆزخانەی سوید لە بەغدا و سووتاندنی، هێرشکردنە سەر باڵیۆزخانەی ئەمریکا دوای بە ئامانجگرتنی هەریەک لە قاسم سولەیمانی و ئەبوو مەهدی موهەندیس، ئەمە جگە لە چەندین هێرشی دیکە بۆ سەر کۆنسوڵخانەی ئەمریکا لە هەولێر.

 

لێدوانی فەرمی: لیوا بەلاسیم محەمەد حەسەن، بەڕێوەبەری پۆلیسی پاراستنی باڵیۆزخانە و دیپلۆماتکاران ڕایگەیاند: "پێشتر باڵیۆزخانەکانی ناوخۆی وڵات تووشی زنجیرەیەک هێرش و کردەوەی تێکدەرانە بوون، بەڵام ئەمڕۆ هەموو ڕێکارێک گیراوەتەبەر کە پارێزگارییەکی تەواو بۆ نوێنەرایەتییە دیپلۆماسییەکان دابین دەکات".