پێكهاتەی ئەرمەن لە دادگەی فیدراڵی سكاڵا تۆمار دەكەن

ئاڤا نیوز

نوێنەری پێکهاتەی ئەرمەن لە کوردستان، لە دادگەی فیدراڵی عێراق، سکاڵای لەسەر کۆمیسیۆنی هەڵبژاردنەکان تۆمار کردووە و داوای گەڕانەوەی کورسیی کۆتای ئەرمەن دەکات.

وێنە گەورەکە: هەنگاوەکان بۆ دیاریکردنی وادەیەکی نوێ بۆ بەڕێوەچوونی هەڵبژاردن لە کوردستان دەستپێکردووە، پێکهاتەکان ئەمەیان بە هەل زانیوە بۆ گەرەنتیکردنی کورسییەکانیان لە دادگەی فیدراڵی سکاڵایان لەسەر کۆمیسیۆن تۆمارکردووە، یروانت نیسان ماركوس وەک نوێنەری پێکهاتەی ئەرمەن لە دادگەی فیدراڵی عێراق سكاڵای لەسەر کۆمیسیۆن تۆمارکردووە.

لێدوانی فەرمی: یروانت نیسان ماركوس بە ئاڤا نیوزی گوت: "لە سکاڵاکە دوامان کردووە، هەڵبژاردن بە سیستمی یەک بازنەیی بێت و لە 100 کورسییەكە، کورسییەک بۆ پێکهاتەی ئەرمەن تەرخان بکرێت."

ئەوەی پێویستە بیزانیت: دوای سکاڵای سەرۆکوەزیران بارزانی، دادگەی فیدراڵی سەرجەم ئامادەکارییەکانی کۆمیسیۆنی بۆ بەڕێوەبردنی هەڵبژاردنی خولی شەشەمی پەرلەمانی کوردستان ڕاگرت.