عێراق 12 فڕۆکەی جەنگی لە پاکستان دەکڕێت

ئاڤا نیوز

 

عێراق گرێبەستی کڕینی 12 فڕۆکەی جەنگی و مەشقی بە بەهای ملیارێک و 800 ملیۆن دۆلاری ئەمریکی لەگەڵ پاکستان کردووە.

 

بۆچی گرنگە؟ عێراق دەیەوێت پەرە بە توانا سەربازییەکانی لەسەر ئاستی فڕۆکەوانی و بەرگریی ئاسمانی بدات و هاوکات چاوی لەوەیە سیستمێکی پێشکەوتووی بەرگریی ئاسمانی بۆ وڵاتەکە دابین بکات.

 

لێدوانی فەرمی: سەرچاوەیەکی باوەڕپێکراو بە ڕۆژنامەی "The Nation"ـی پاکستانی ڕاگەیاند، گرێبەستی کڕینی ئەو 12 فڕۆکەیە لەنێوان فەرماندەی هێزی ئاسمانیی پاکستان و فەرماندەی هێزی ئاسمانیی عێراق کراوە، بۆ کڕینی 12 فڕۆکە لە جۆرەکانی "MFI Mushshak"ی مەشقی و "JF-17" جەنگی بە بەهای ملیارێک و 800 ملیۆن دۆلار.

 

ئەمەش بزانە: دوای سەردانەکەی سوودانی بۆ ئەمریکا، بەغدا گرێبەستی کڕینی 41 فڕۆکەی لەگەڵ واشنتن کردووە، ڕێککەوتنەکە 12 فڕۆکەی "بێڵ 412" و نۆ فڕۆکەی "بێڵ 407" لەخۆ دەگرێت.