هاوپەیمانیی تەقەدووم بە فەرمی پشتیوانی لە کاندیدکردنی مەشهەدانی دەکات بۆ سەرۆکی پەرلەمان

ئاڤا نیوز

 

دواجار هاوپەیمانیی تەقەدووم بە سەرۆکایەتیی محەممەد حەلبووسی بە فەرمی پشتیوانی خۆی بۆ کاندیدکردنی مەحموود مەشهەدانی ڕاگەیاند و داوا لە فراکسیۆنە سیاسییەکان دەکات پشتگیری لەم کەسە بکەن.

 

وێنە گەورەكە: دوای چوارجار هەوڵدان بۆ هەڵبژاردنی سەرۆکی پەرلەمانی عێراق لە ماوەی شەش مانگی ڕابردوو، هێشتا جێگرەوەی حەلبووسی دیاری نەکراوە، بەڵام دوای درێژکرنەوەی ماوەی یاسادانان حەلبووسی و هەندێک لایەنی دیکەی سوننە دەنگ بە مەحموود مەشهەدانی دەدەن.

ڕاگەیێنراوی فەرمی: نووسینگەی ڕاگەیاندنی پارتی تەقەدووم ڕایگەیاند: "پشتیوانی خۆمان بۆ کاندیدکردنی مەحموود مەشهەدانی بۆ وەرگرتنی پۆستی سەرۆکی ئەنجوومەنی نوێنەران ڕادەگەیێنین".

 

زانیاریی زیاتر: هاوپەیمانی تەقەدووم ئاماژەی بەوەش کردووە، لەبەر ڕۆشنایی باوەڕبوونمان بە گرنگی ڕۆڵی چاودێری و یاسادانان لە ئەنجوومەنی نوێنەران و پێویستی کاراکردنی ئەم ڕۆڵە لە چوارچێوەی سیستەمی هاوسەنگی سیاسی بە لەبەرچاوگرتنی گرنگی پاراستنی ئەم مافە، وەک نوێنەری زۆرینەی سوننە لە ئەنجوومەنی نوێنەران، پشتیوانی لە کاندیدکردنی مەحموود مەشهەدانی دەکەین.

 

ئەوەی پێویستە بیزانیت: پێنجشەممەی ڕابردوو پەرلەمانی عێراق خولی یاسادانانی بۆ ماوەی مانگێک درێژ کردەوە، ئامانجیش لێی هەڵبژاردنی سەرۆکێکی نوێ بوو.