لایەنە کوردستانییەکان پشتگیری کام بەربژێر بۆ سەرۆکی ئەنجوومەنی نوێنەران دەکەن؟

ئاڤا نیوز

 

مەحموود مەشهەدانی و سالم عیساوی کێبڕکێ لەسەر بەدەستهێنانی پۆستی سەرۆکی پەرلەمانی عێراق دەکەن، ئەمەش دەنگی لایەنە کوردییەکانی دابەش کردووە. 

 

وێنە گەورەکە: بڕیارە ڕۆژی شەممە 18-05-2024, ئەنجوومەنی نوێنەرانی عێراق بۆ هەڵبژاردنی سەرۆکی ئەنجوومەنەکە کۆببنەوە، هەریەک لە مەحموود مەشهەدانی و سالم عیساوی بەربژێرن بۆ وەرگرتنی ئەم پۆستە.

 

بۆچوونی لایەنەکان: لایەنە کوردستانییەکان پشتگیری کام بەربژێر دەکەن و دەنگی پێ دەدەن؟

 

پارتی: شێروان دووبەردانی ئەندامی فراکسیۆنی پارتی، بە ئاڤا نیوزی ڕاگەیاند: ئێمە لەگەڵ زۆرینەی سوننەین کە تەقەدووم لە پشتیەتی و هاوپەیمانی پێک دەهێنن، پێشتریش چەندین جار محەممەد حەلبووسی سەردانی سەرۆک بارزانی کردووە، ڕێز لەو ڕێککەوتنە سیاسییە دەگرین، بەدڵنیاییەوە دەنگ بە مە‌حموود مەشهەدانی دەدەین کە بڕیار درا زۆرینەی سوننەی لەگەڵ بێت.

 

یەکێتی: هەرێم کەمال ئاغا، سەرۆکی فراکسیۆنی یەکێتی لە ئەنجوومەنی نوێنەرانی عێراق، بە ئاڤا نیوزی ڕاگەیاند: ئێمە چاوەڕوان دەکەین سوننە لەسەر یەک کاندید ڕێک بکەون، ئەگەر لە یەک کاندید زیاتر بوو، ئەو کاتە بەپێ بڕیاری سەرووی خۆمان بڕیار دەدەین.

 

یەکگرتووی ئیسلامی کوردستان: موسەننا ئەمین، ئەندامی فراکسیۆنی یەکگرتوو بە ئاڤا نیوزی ڕاگەیاند: پاڵپشتیی سالم عیساوی دەکەین و بۆ ئەو پۆستە بە گونجاوی دەزانین.

 

کۆمەڵی دادگەریی کوردستان: سۆران عومەر، سەرۆکی فراکسیۆنی کۆمەڵی دادگەریی کوردستان بە ئاڤا نیوزی ڕاگەیاند: ئێمە پاڵپشتی سالم عیساوی دەکەین.

 

نەوەی نوێ: هێشتا بڕیارمان نەداوە، پێش کۆبوونەوەی ئەنجومەنی نوێنەران بڕیاری خۆمان دەدەین.