هەفتەی ئایندە ئەنجوومەنی وەزیرانی عێراق خشتەی بودجە پەسەند دەکات

ئاڤا نیوز

 

یەکشەممەی ئایندە ئەنجوومەنی وەزیرانی عێراق بۆ پەسەندکردنی خشتەی بودجەی 2024 عێراق کۆ دەبێتەوە و دواتریش ڕەوانەی پەرلەمانی دەکات.

 

بۆچی گرنگە؟ هەرێمی کوردستان لە پڕۆژەیاسای بودجە، جگە لە مووچە پشکی دیکەی هەیە، وەک خەرجیی وەبەرهێنان و بەکاربردن، تێچووی بەرهەمهێنانی نەوت و بیمەی کۆمەڵایەتی.

 

لێدوانی فەرمی: مستەفا گەرعاوی، ئەندامی لیژنەی دارایی لە پەرلەمانی عێراق ڕایگەیاند: یەکشەممەی ئایندە ئەنجوومەنی وەزیران لە دانیشتنێکی تایبەتدا دەنگ لەسەر خشتەی بودجە دەدات بۆ ئەوەی بەخێرایی بگاتە ئەنجوومەنی نوێنەران و لەوێش دەنگی لەسەر بدرێت.

 

زانیاریی زیاتر: گەرعاوی هۆشداریدا لەوەی، ئەگەر نەختینەی دارایی بۆ پڕۆژەکان مسۆگەر نەکرێت، ڕەنگە خاوی بکەوێتە جێبەجێکردنی پڕۆژەکان، ئەو نەختینەیەش لە ڕێگەی خشتەی بودجەوە مسۆگەر دەکرێت.

 

ئەوەی پێویستە بیزانیت: بە مەبەستی گفتوگۆكردن لەسەر هەمواری خشتەی بودجە و چارەسەركردنی ئەو گرفتانەی بۆ پشكی هەرێم دروست دەبێت، شاندێکی هەرێمی کوردستان لە بەغدان.