ئایا لایەنە كوردییەكان دەنگ بە پێشنیازە یاسای پشووی ڕۆژی غەدیر دەدەن؟

ئاڤا نیوز

موقتەدا سەدر ڕێبەری 'ڕەوتی نیشتیمانیی شیعە' لە نوێترین دەرکەوتنیدا داوای کرد ڕۆژی "غەدیر" بکرێتە پشووی فەرمی، ئەم بابەتەش مشتومڕی لێکەوتەوە و بەشێک لە فراکسیۆنەکان خۆیان یەکلایی نەکردووەتەوە دەنگ بە پێشنیازە یاساکە بدەن.

ئەوەی پێویستە بیزانیت: ڕۆژی 18ی زیلحیجە کە بە ڕۆژی "غەدیر" ناسراوە، لای شیعە مەزهەبەکان بە ڕۆژێکی پیرۆز دادەنرێت.

لێدوانە فەرمییەکان: جەمال کۆچەر، لە فراکسیۆنی یەکگرتوو: فراکسیۆنەکەمان لەگەڵ ئەم پێشنیازە یاسایە نییە و دەنگی پێنادەین.

- سۆران عومەر، لە کۆمەڵی دادگەری: ئێمەش دەنگ بە یاساکە نادەین. 

- کاروان یاروەیس لە فراکسیۆنی یەکێتی: پڕۆژەکە وەکو یەک پاکێج سەیر دەکەین و هەموو بۆنە نیشتمانییەکانی عێراقی تێدایە بە نەورۆزیشەوە، تا ئێستا بڕیارمان نەداوە دەنگی پێ دەدەین یاخود نا.

ئەمەش بزانە: پێشتر لە دانیشتنێکی پەرلەمانی عێراق، خوێندنەوەی یەکەم بۆ پێشنیازە یاساکە کراوە، بەڵام بەهۆی مشتومڕی نێوان شیعە و سوننە خوێندنەوەکە پەک خرا.

زانیاریی بەدەستهاتوو: ئاڤا نیوز زانیویەتی زۆربەی لایەنە کوردی و سوننەکان ئامادە نین دەنگ بەو پێشنیازە یاسایە بدەن، پێیان وایە ئەوە شتێکە تەنیا پەیوەندی بە شیعەوە هەیە.