ڕێگەی گەشەپێدان دەرفەتی شەش ملیۆن هەلی کار دەڕەخسێنێت

ئاڤا نیوز

 

ڕاوێژکارێکی سەرۆکوەزیرانی عێراق بۆ کاروباری گواستنەوە ڕایدەگیێنێت, پڕۆژەی "ڕێگەی گەشەپێدان"، داهاتی بەردەوام بۆ عێراق دابین دەکات و نزیکەی شەش ملیۆن هەلی کاریش دەڕەخسێنێت.

 

بۆچی گرنگە: پڕۆژەی ڕێگەی گەشەپێدان، هاوکار دەبێت لە گەشەی ئابووری و پتەوکردنی پەیوەندییە هەرێمی و نێودەوڵەتییەکان و کار بۆ بەدیهێنان و یەکخستنی ئابووری دەکات, هۆکارێکیشە بۆ بەستنەوەی ئابووری ناوچەکە بە کیشوەری ئەوروپا.

 

لێدوانی فەرمی: ناسر ئەسەدی، ڕاوێژکاری سەرۆکوەزیرانی عێراق بۆ کاروباری گواستنەوە ڕایگەیاند: "پڕۆژەی ڕێگەی گەشەپێدان تەواو ئابوورییە، لەڕێگەی دامەزراندنی کۆمەڵێک پڕۆژەی گەورەوە سەرچاوەی داهاتەکان فرەچەشن دەکرێت و بەلایەنی کەمیشەوە شەش ملیۆن هەلی کار دەڕەخسێت."

 

مەترسییە پێشبینیکراوەکان: سەرۆکوەزیران بارزانی ڕایگەیاند: "ئەو تێڕوانینەی بۆ ڕێگەی گەشەپێدان هەمانە و بەو پێشنیازەی پێشکەشی بەغدامان کردووە، هێشتا نازانین بە چ جۆرێک دەبێت". 

 

چارەسەرەکان: سەرۆکوەزیران بارزانی هیوای خواست، پرۆژەکە بەرژەوەندی هەموو پێکهاتەکانی عێراق لەبەرچاو بگرێت و عێراق تەنیا هێڵی پەیوەندیکردنی کەنداو بە ئەوروپا نەبێت.

 

باکگراوند: لە ساڵی 2022ـەوە ژێرخانی پڕۆژەی ڕێگەی گەشەپێدان لە نێوان عێراق و تورکیا و ئیمارات دانرا". بڕیارە ساڵی 2028 دەست بە پڕۆژەکە بکرێت و پێشبینی دەکرێت بە چوار ساڵ تەواو بکرێت.