دەستپاکیی عێراق: فەرمانی دەستگیرکردن بۆ 25 بەرپرسی باڵا دەرکراوە

ئاڤا نیوز

 

دەستەی دەستپاکیی عێراق ڕایدەگەیێنێت، تەنیا لە مانگی چواری ئەمساڵ، فەرمانی دەستگیرکردن و بانگهێشتکردن بۆ 25 بەرپرسی باڵا دەرکراوە.

 

بۆچی گرنگە؟ لە دوای ساڵی 2003ـەوە، گەندەڵی لە عێراق بووەتە دیاردە و سەرجەم دامەزراوەکانی دەوڵەتی گرتووەتەوە، ئێستاش گەیشتووەتە ئاستێكی مەترسیدار.

 

ڕاگەیێنراوی فەرمی: دەستەی دەستپاکیی عێراق لە ڕاگەیێنراوێکدا ئاماری چالاکییەکانیان لە ماوەی مانگی چواری 2024 ئاشکرا دەکات و ئاماژە بەوە دەدات، تەنیا لەو مانگەدا، "پەیوەست بە دۆسییەکانی گەندەڵی، فەرمانی دەستگیرکردن و بانگهێشتکردن بۆ 25 بەرپرسی باڵا دەرکراوە، لەنێویاندا وەزیرێکی ئێستا و دوو وەزیری پێشوو هەن".

 

ژمارەکان وادەڵێن: ئەوانەی فەرمانی دەستگیرکردن و بانگهێشتکردنیان بۆ دەرکراوە بەم شێوەیەیە: وەزیرێکی ئێستا، دوو وەزیری پێشوو، وەزیرێکی پێشووتر، ئەندامێکی پێشووی پەرلەمان، شەش بەڕێوەبەری گشتی، حەوت بەڕێوەبەری گشتی پێشوو، سێ بەڕێوەبەری گشتی پێشووتر، دوو پارێزگاری پێشوو، پارێزگارێکی پێشووتر و ئەندامێکی ئەنجوومەنی پارێزگا.

 

ئەمەش بزانە: بەپێی ئامارەکانی دەستەکە بۆ مانگی سێی 2024 ئاشکرای کردبوو، "فەرمانی دەستگیرکردن بۆ 37 کەسی پلە باڵا دەرکراوە، کە لەنێویاندا سێ وەزیری پێشوو هەبوون".