ئەمساڵ 975 هەزار تۆن گەنم لە جووتیارانی هەرێمی کوردستان وەردەگیرێت

ئاڤا نیوز

 

لە خەرجیی حاکیمەی عێراق، بودجەی تایبەت بۆ وەرگرتنی بەرهەمی دانەوێڵە تەرخان کراوە، بڕیارە ئەمساڵ نزیکەی یەک ملیۆن تۆن گەنمی جووتیارانی هەرێمی کوردستان وەردەگیرێت.

 

وێنە گەورەکە: گفتوگۆی نێوان هەولێر و بەغدا لەسەر یەکلاییکردنەوەی بڕی وەرگیراوی گەنمی جووتیاران بەردەوامە؛ سەرۆکوەزیران بارزانی لەسەر هێڵە بۆ ئەوەی مافی جووتیارانی هەرێمی کوردستان نەفەوتێت و پێداگری لەوە کراوە لەسەر بنەمای ڕووپێوی سەتەلایەتی و ڕووبەری داچێنراو، گەنمی جووتیاران وەربگیرێت.

 

لێدوانی فەرمی: بێگەرد تاڵەبانی، وەزیری کشتوکاڵی هەرێمی کوردستان بە ئاڤا نیوزی ڕاگەیاند: "لەڕێگەی فوئاد حوسێن، جێگری سەرۆکوەزیرانی عێراق، نووسراوی فەرمی ئاراستەی سوودانی کراوە و پەسەندی کردووە، تەنیا ماوەتەوە سەر ئەوەی فەرمانەکە بگاتە لیژنەی 57 بۆ ئەوەی جێبەجێ بکرێت".

 

زانیاریی بەدەستهاتوو: بڕیارە ئەمساڵ نزیکەی دوو ئەوەندەی پارساڵ، گەنمی جووتیاران وەربگیرێت و بڕەکەی 975 هەزار تۆن دەبێ، لەماوەی 10 ساڵی ڕابردووش ئەوە یەکەمجارە عێراق ئەو بڕە گەنمە لە جووتیارانی هەرێمی کوردستان وەردەگرێت.

 

ئەمەش بزانە: لە خشتەی بودجەی 2024 لەسەر خەرجیی حاکیمە، بڕی 742 ملیار و 715 ملیۆن دینار بۆ کڕینی دانەوێڵە لە جووتیارانی هەرێمی کوردستان تەرخان کراوە.