سعودیە ڕێگە بە هیچ کەسێک نادات هەڵگری هەر جۆرە ڤیزەیەک بچێتە خاکی مەککە

ئاڤا نیوز

 

سعودیە ڕێگە بە هیچ کەسێک نادات کە هەڵگری هەر جۆرە ڤیزەیەک بێت، بچێتە نێو خاکی مەککەی پیرۆز یاخود لەوێ بمێنێتەوە، لەمڕۆوەش بڕیارەکە دەچێتە بواری جێبەجێکردنەوە.

 

بۆچی گرنگە: لە هەرێمی کوردستان تەنیا چوار هەزار و 685 کەس مافی بەشدارییان لە حەجی ئەمساڵدا هەیە، بەڵام زیاتر لە 15 هەزار کەس بە ڤیزەی یەکساڵی و بەبێ مۆڵەت چوونەتە سعودیە و حەج دەکەن.

 

ڕاگەیێنراوی فەرمی: وەزارەتی ناوخۆی سعودیە ڕایگەیاند: بڕیار دراوە ڕێگە بە هیچ کەسێک نەدرێت کە ڤیزەی سەردان بە هەموو جۆرەکانیەوەی هەبێت، بچێتە ناو شاری مەککە یان بمێنێتەوە، بڕیارەکەش لە ڕۆژی 23-5-2024ـەوە دەستپێدەکات و تاوەکو 21-6-2024 بەردەوام دەبێت.

 

زانیاریی زیاتر: وەزارەتەکە لە هەژماری خۆی لە تۆڕی کۆمەڵایەتیی ئێکس نووسیویەتی، "ڤیزەی سەردان بە هەموو جۆر و ناوێکەوە بە مۆڵەت نازانرێت بۆ ئەنجامدانی فەریزەی حەج. هەر کەسێک سەرپێچی ئەو بڕیارە بکات، بەپێی یاسا و ڕێنماییەکانی شانشینی یەکگرتوو سزای بەسەردا دەسەپێنرێت".