پێشنیازێکی نوێ بۆ پێکهێنانی حکومەتی خۆجێی کەرکووک دەخرێتەڕوو

ئاڤا نیوز

بۆ ڕێککەوتن لەسەر پۆستەکانی پارێزگای کەرکووک پێشنیازێکی نوێ دەخرێتەڕوو، کورد، عەرەب و تورکمان سوورن لەسەر وەرگرتنی پۆستی پارێزگاری کەرکووک.

وێنە گەورەکە: شەش مانگ بەسەر هەڵبژاردنی ئەنجوومەنی پارێزگاکانی عێراق و  نزیکەی سێ مانگ بەسەر بەڕێوەچوونی یەکەم کۆبوونەوەی لایەنە براوەکانی کەرکووک بەسەرپەرشتی سوودانی تێدەپەڕێت، تا ئێستا لایەنەکان لەسەر بنەمایەک بۆ پێکهێنانی حکومەتی خوجێیی نەگەیشتوونەتە ڕێککەوتن.

زانیاریی بەدەستهاتوو: پێشنیازکراوە پارێزگاری کەرکووک دوو جێگری هەبێت، پۆستەکە بۆ کورد بێت و جێگرەکان یەكێک عەرەب و ئەوەی دیکە تورکمان بێت، سەرۆکی ئەنجوومەن بۆ عەرەب و ئەویش دوو جێگری دەبێت ئەوانیش کورد و تورکمان.

لێدوانە فەرمییەكان: جەمال شوکر، بەرپرسی پەیوەندییەکانی یەکێتیی لە کەرکووک بە ئاڤا نیوزی گوت:"سوورین لەسەر دابەشکردنی پۆستەکانی پارێزگاکە بە ڕێککەوتنی لایەنە سیاسییەکان".

حەسەن مەجید، سەرۆکی فراکسیۆنی پارتی لە ئەنجوومەنی پارێزگای کەرکووک بۆ ئاڤا نیوز:"ئاگاداری پێشنیازی لەم شێوەیە نین و بەدەستمان نەگەیشتووە".

ئیسماعیل حەدیدی، سەرکردە لە هاوپەیمانی عەرەبی بۆ ئاڤا نیوز: "عەرەب بە پۆستی جێگری پارێزگار ڕازی نابێت".

ئەحمەد ڕەمزی، ڕاوێژکاری سەرۆکی بەرەی تورکمانی بۆ ئاڤا نیوز: "هیچ ڕێککەوتنێک لەسەر ئەم پێشنیازە نەکراوە".