ڕێکارەکانی دامەزراندنی 11 هەزار یەکەمەکەی خوێندنی باڵا دەستی پێ کرد

ئاڤا نیوز

 

بەڕێوەبەری گشتیی دیوان لە وەزارەتی خوێندنی باڵا ئاشكرای كرد، بە نووسراوی فەرمی ناوی نزیکەی 11 هەزار کەس بۆ وەزارەتی دارایی نێردراوە تا دابمەزرێن.

 

وێنە گەورەکە: لەسەر بڕیاری سەرۆکوەزیران بارزانی، وەزارەتی خوێندنی باڵا و توێژینەوەی زانستی، پڕۆسەی دامەزراندنی سێ یەکەمەکانی زانکۆ و پەیمانگەکانی هەرێمی کوردستان دەست پێ کردووە و لە قۆناغی کۆتاییدایە.

 

لێدوانی فەرمی: د. توانا نەجەف، بەڕێوەبەری گشتیی دیوان لە وەزارەتی خوێندنی باڵا بە ئاڤا نیوزی گوت: "ناوەکان بۆ وەزارەتی دارایی نێردراون لە سیستەمی بایۆمەتری دڵنیایی وەردەگیرێت دەربارەی ئەوەی کە مووچەی دیکەیان نەبێت و دانەمەزرابن".

 

ئەوەی پێویستە بیزانیت: بە بڕیاری سەرۆکوەزیران بارزانی، هەزار و 300 قوتابیی یەکەمی زانکۆ و پەیمانگەکانی ساڵی خوێندنی 2016-2017 دامەزرێنران و لە ساڵی 2018ـەوە قەیرانی دارایی و بڕینی بودجەی هەرێمی کوردستان پڕۆسەکەی وەستاند، ئێستا یەكەمی ساڵانی 2017-2018 تاوەکو 2022-2023 دادەمەزرێنرێن.