چێشتخانەیەکی ئەمریکی لە بەغدا کرایە ئامانج

ئاڤا نیوز

چێشتخانەیەکی خواردنی ئەمریکی لە بەغدا، بە بۆمب کرایە ئامانج و دوو کەسیش دەستگیرکراون.

زانیاریی بەدەستهاتوو: چێشتخانەی (KFC) لە شەقامی فەلەستینی ڕۆژهەڵاتی بەغدا بە بۆمبێک کراوەتەوە ئامانج، جگە لە زیانی ماددی  هیچ زیانێکی گیانی نەبووە.

ڕاگەیێنراوی فەرمی: فەرماندەی ئۆپەراسیۆنەکانی بەغدا ڕایگەیاند: دوو کەسی نەناسراو کە ماتۆڕسکیلێکیان پێبووە، بۆمبێکیان فڕێداوەتە بەردەم دەرگای چێشتخانەیەک و دواتریش هێزە ئەمنییەکان چوونەتە شوێنی ڕووداوەکە.

زانیاریی زیاتر: دوای سەیرکردنەوەی کامێراکانی چاودێری و بەدواداچوونەکان ئەو دوو کەسەی دەستگیرکراون و دەست بەسەر ماتۆڕسکیلەکە و چەکیشدا گیراوە.

ئەوەی پێویستە بیزانیت: KFC زنجیرەیەک چێشتخانەی خواردنی خێرایە کە لقی سەرەکیی لە ئەمریکایە، لقی لە 123 وڵاتدا هەیە، ماوەکانی ڕابردوو بەشێک لە وڵاتان چێشتخانەکەیان بەوە تۆمەتبار کرد کە پشتیوانی لە هێرشەکانی ئیسرائیل بۆ سەر غەزە دەکات و لقەکانیان داخست.