لە نێوان هەولێر و دەوحە کۆڕبەندی بازرگانی و وەبەرهێنان بەڕێوە دەچێت

ئاڤا نیوز

 

لە دوای کۆبوونەوەی سەرۆکوەزیرانی هەرێمی کوردستان و سەرۆکوەزیرانی قەتەر لە داڤۆس، بڕیار درا لە نێوان هەردوولا کۆڕبەندێکی بازرگانی و وەبەرهێنان دەکرێت.

 

لێدوانی فەرمی: د. محەممەد شوکری، سەرۆکی دەستەی وەبەرهێنان بە ئاڤا نیوزی ڕاگەیاند: بڕیارە لە 27 و 28ـی مانگی ئەیلوول گەورەترین کۆڕبەندی بازرگانی و وەبەرهێنان لە نێوان هەولێر و دەوحە بەڕێوە بچێت.

 

بۆچی گرنگە: قەتەر یەکێکە لە وڵاتە کاریگەر و پێشکەوتووەکان لە کەرتی وەبەرهێنان و بازرگانی، لەم کۆڕبەندە هەرێمی کوردستان دەیەوێت وەبەرهێنەر و بازرگانەکانی ئەو وڵاتە بێنە هەرێمی کوردستان بە مەبەستی وەبەرهێنان و کاری بازرگانی.

 

ئەوەی پێویستە بیزانیت: لە کۆڕبەندەکەدا وەبەرهێنەرەکانی قەتەر و هەرێمی کوردستانی بەشداری دەکەن و ڕاگۆڕینەوە و ڕاوێژ و هەماهەنگی دەکەن لەو بوارەدا، سوود لە ئەزموونی ئەو وڵاتە وەردەگیرێت. 

 

ئەمەش بزانە: ڕۆژی 16ـی کانوونی دووەمی 2024 لە داڤۆس، سەرۆکوەزیران بارزانی، لەگەڵ شێخ محەممەد بن عەبدولڕەحمان ئال سانی، سەرۆکوەزیران و وەزیری دەرەوەی قەتەر کۆبووەوە، جەختیان لە پەرەپێدانی پەیوەندی دوولایەنە و وەبەرهێنان و هاتنی وەبەرهێنەرە قەتەرییەکان بۆ هەرێمی کوردستان و هەناردەکردنی بەرهەمی ئۆرگانیکی جووتیارانی کوردستان بۆ قەتەر کردەوە .

 

باکگراوند: هەر لە داڤۆس لە میانی کۆڕبەندی ئابووریی جیهانی، شاندێکی دەستەی وەبەرهێنانی قەتەر سەردانی ماڵی کوردستانی کرد و لەگەڵ وەبەرهێنەرە کوردییەکان بۆ دروستکردنی هەماهەنگی زیاتر کۆبوونەوە.