بریکاری وەزارەتی نەوتی عێراق: هەوڵ دەدەین بەزووترین کات هەناردەکردنی نەوتی کوردستان دەستپێبکاتەوە

ئاڤا نیوز 

 

بریکاری وەزیری نەوتی عێراق بۆ کاروباری دەرهێنانی نەوت، جەخت لەسەر هەوڵەکانیان دەکاتەوە بۆ ئەوەی بەزووترین کات هەناردەکردنەوەی نەوتی کوردستان دەستپێبکاتەوە. 

 

لێدوانی فەرمی: باسم محەممەد، بریکاری وەزیری نەوتی عێراق بۆ کاروباری دەرهێنانی نەوت ڕایگەیاند: هەوڵ دەدەین بەزووترین کات هەناردەکردنی نەوتی هەرێمی کوردستان دەستپێبکاتەوە، لەگەڵ هەرێمی کوردستان لە گفتوگۆداین و بەهیواین لە ماوەی چەند ڕۆژی داهاتوودا بگەینە دیدگایەکی هاوبەش.

زانیاریی زیاتر: بەگوتەی باسم محەممەد ئامانجی وەزارەتی نەوتی عێراق هەموارکردنی گرێبەستی کۆمپانیا نەوتییەکانە، بەجۆرێک لەگەڵ ستراتیژییەتی وەزارەتی نەوت یەکبگرێتەوە.

 

 لەلایەکی دیکەوە: محەممەد نووری، ئەندامی لیژنەی دارایی پەرلەمانی عێراق ڕایگەیاند، خەزێنەی دەوڵەتی عێراق بەهۆی هەناردەکردنی نەوتی هەرێمی کوردستان هیچ زیانێکی بەرنەکەوتووە، لەبەر ئەوەی جێگرەوەی دیکە هەبووە.

 

ئەوەی ئێستا ڕوودەدات: سەرۆكوەزیران بارزانی لە بەغدایە و لە کاتی گەیشتنی ڕایگەیاند: "لە بەغدام بۆ جەختکردنەوە لەسەر دابینکردنی مافەکانی خەڵکی کوردستان و چارەسەرکردنی ناکۆکییەکان بە گفتوگۆ و لەسەر بنەمای دەستوور، دەبێت سەقامگیریی و ئابوورییەکی بەهێز کاری لەپێشینەمان بێت".