نزیکەی 750 خێزان بەهۆی گۆڕانی کەشوهەواوە لە عێراق ئاوارە دەبن

ئاڤا نیوز

بەهۆی کاریگەرییەکانی کەشواهەوا، نزیکەی 750 خێزان لە ناوەڕاست و باشووری عێراقەوە ئاوارەی شاری نەجەف بوون.

ڕاگەیێنراوی فەرمی: فەرمانگەی کۆچ و کۆچبەران لە نەجەف ڕایگەیاند: 743 خێزان لە پارێزگاکانی دیوانیە و موسەننا و زیقار بەهۆی دیاردەی بە بیابانبوون و  گۆڕانی کەشواهەواوە ئاوارەی پارێزگای نەجەف بوون.

ئەوەی پێویستە بیزانیت: پێشتر ڕێکخراوی خۆراک و کشتوکاڵ (فاو) سەر بە نەتەوە یەکگرتووەکان بڵاویکردبووە: ملیۆنێک و سەد کەس لە عێراق بەهۆی کاریگەرییەکانی گۆڕانی کەشوهەوا لە عێراق ئاوارە بوون و کاریگەریی خراپی لەسەر دەرفەتی کار و داهاتی خێزانەکان کردووە.

لە لایەکی دیکەوە:  دەستەی کەشوهەوای عێراق بڵاویكردەوە: ئەمڕۆ لە پێنج پارێزگای عێراق پلەی گەرما گەیشتووەتە 46 پلە، دەستەکە پێشبێنی دەکات لە ڕۆژانی داهاتوو پلەی گەرما بەرزبوونەوەی زیاتر بەخۆیەوە ببینێت.