سەنتەرێکی عێراقی: بێدەنگكردنی دەنگە ئازادەكان لە عێراق دەبێتە دیاردە

ئاڤا نیوز 

 

عێراق بووەتە گۆڕەپانی پێشێلکاریی مافەکانی مرۆڤ، پێشهاتەکانی ئەو بوارە مەترسیدارن و چالاکوانان دەڵێن بە بەرنامە  ئەو کارە دەکرێت.

 

وێنە گەورەکە: وڵاتی عێراق یەکێکە لەو وڵاتانەی ئازادی ڕۆژنامەوانیی و پێشێلکردنی مافەکانی مرۆڤ تێیدا لە ئاستێکی خراپدایە، بەپێی ڕیزبەندیی ڕێکخراوی "پەیامنێرانی بێسنوور" لە ڕیزی 169ەمینی وڵاتانی جیهانە بۆ ئازادیی ڕۆژنامەوانی.

 

لێدوانی فەرمی: عەلی عەبادی، سەرۆکی سەنتەری عێراق بۆ مافەکانی مرۆڤ بە ئاڤا نیوزی گوت: "سیاسەتی بێدەنگکردنی دەنگە ئازادەکان بووەتە دیاردە و بەشێوەیەکی بەرنامە بۆ داڕێژراو و بە قۆناغ کاری بۆ دەکرێت، ئەمەش نیشانەی گەڕانەوەیە بۆ سەردەمی دیکتاتۆرییەت".

 

زانیاریی زیاتر: "دەنگی ناڕازی و ئازاد لە عێراق بە کوشتن یان تۆمارکردنی سکاڵای یاسایی وەڵامیان دەدرێتەوە، تەنیا لە پێنچ مانگی ئەمساڵەوە لە پارێزگای بەسرە 12 بۆ 18 سكاڵای بێدەنگکردنی دەنگی ئازاد و ڕەخنەگر تۆمار کراون". عەلی عەبادی ئەوەشی گوت.

 

ئەوەی پێویستە بیزانیت: بەپێی کۆمەڵەی بەرگریکردن لە ئازادیی ڕۆژنامەوانی، لە مانگی ئایاری ساڵی ڕابردوو تا مانگی ئایاری ئەمساڵ لە عێراقدا 333 پێشێلکاری بەرامبەر ماف و ئازادیی ڕۆژنامەنووسان تۆماکراون.