شارۆچکەیەكی عێراق زیاتر لە نیو سەدەیە كارەبای نیشتمانی نییە

ئاڤا نیوز

زياتر لە نیو سەدەیە شارۆچكەیەكی سەر بە پارێزگای موسەنا لە عێراق لە كارەبای نیشتمانی بێبەشە، موەلیدەكانیش تەنیا 12 كاتژمێر كارەبایان پێ دەدەن.

لێدوانی فەرمی: تۆفیق حەسانی، بەڕێوەبەری ناحیەی بەسیەی پارێزگای موسەنا لە باشووری عێراق ڕایگەیاند: لە ساڵی 1970ـەوە تا ئێستا کارەبای نیشتمانیمان نییەو تەنیا کارەبای موەلیدەمان هەیە، ئەویش فەرمانگەی کارەبای موسەنا بۆیان دابین کردووین.

ئەوەی پێویستە بیزانیت: بەدرێژایی ئەو چەند ساڵە، حکومەت بیری لەوە نەکردووەتەوە هێڵێ کارەبای نیشتمانی بۆ ئەو شارۆچکەیە ڕابكێشێت و تەنیا پشتیان بە کارەبای موەلیدە بەستووە کە لە هاویندا 12 کاتژمیر کارەبا دەدەنە هاووڵاتیان، لە زستانیشدا پێنج بۆ نۆ کاتژمێر.

باكگراوند: بەسیە لە ساڵی 1958 بە مەرسوومێکی کۆماری بووەتە ناحیە، سەر بە قەزای سەلمانە لە پارێزگای موسەنا، 300 کیلۆمەتر لە سەنتەری پارێزگاکەوە دوورە، ژمارەی دانیشتووانەکەی زیاتر لە 10 هەزار کەسە.