شاخەوان عەبدوڵا: کوردێک دەبێتە پارێزگاری کەرکووک

ئاڤا نیوز

 

دوای جەژن ئەنجوومەنی پارێزگای کەرکووک بۆ هەڵبژاردنی پارێزگار و دابەشکردنی پۆستەکان کۆ دەبێتەوە، جێگری سەرۆکی ئەنجوومەنی نوێنەرانی عێراقیش دەڵێت، پۆستی پارێزگاری کەرکووک بۆ کورد دەبێت.

 

وێنە گەورەکە: کەرکووک تاکە پارێزگایە دوای حەوت مانگ لە بەڕێوەچوونی هەڵبژاردنی ئەنجوومەنی پارێزگاکان، پۆستەکانی دابەش نەکراون؛ تاوەکو ئێستا سێ کۆبوونەوە بە سەرپەرشتیی سوودانی بۆ لێکنزیکبوونەوەی لایەنەکان کراوە و نەگەیشتوونەتە ڕێککەوتوون.

 

لێدوانی فەرمی: د. شاخەوان عەبدوڵا، جێگری سەرۆکی ئەنجوومەنی نوێنەرانی عێراق بە ئاڤا نیوزی ڕاگەیاند، "لەبەر ئەوەی کورد زۆرینەی کورسییەکانی بەدەست هێناوە، پۆستی پارێزگاری کەرکووک بۆ کورد دەبێت و پۆستەکانی دیکە لەنێوان لایەنەکان دابەش دەکرێن".

 

بۆچوونی لایەنی بەرامبەر: ڕەوەند مەلا مەحموود، بەرپرسی مەڵبەندی کەرکووکی یەکێتی بە ئاڤا نیوزی گوت، "هەوڵێکی ئەرێنی هەیە بۆ ڕێککەوتن، دوای جەژن ئەنجامەکەی دیار دەبێت".

 

خاڵی ئەرێنی: بڕیارە دوای جەژنی قوربان، ئەنجوومەنی پارێزگا بۆ هەڵبژاردنی پارێزگار کۆببێتەوە و لە ماوەی دوو مانگدا، سەرجەم پۆستەکان دابەش بکرێن.