تەندروستیی عێراق: پابەندی ڕێنماییەکان بن بۆ خۆپارێزی لە تای خوێنبەربوون

ئاڤا نیوز 

وەزارەتی تەندروستیی عێراق ڕێنمایی تەندروستی بۆ ڕۆژانی جەژن بڵاو دەکاتەوە، داوا لە هاووڵاتییان دەکات بۆ خۆپارێزی لە نەخۆشیی تای خوێنبەربوون پابەندی ڕێنماییەکان بن. 

وێنە گەورەکە: لە ڕۆژانی جەژندا هاووڵاتیانی موسڵمان لە عێراق ئاژەڵ دەکەنە قوربانی و ئەمەش مەترسیی بڵاوبوونەوەی نەخۆشیی تای خوێنبەربوون زیاتر دەکات.

ڕاگەیێنراوی فەرمی: سەیف بەدر، گوتەبێژی وەزارەتی تەندروستیی عێراق ڕایگەیاند: "پێویستە کڕینی گۆشت و سەربڕینی قوربانییەکانتان لە لای گۆشتفرۆش و سەربڕینخانە مۆڵەتپێدراوەکان بێت و ئاگاداری نیشانەکانی نەخۆشی تای خوێنبەربوون بن.

زانیاریی زیاتر: نیشانەکانی نەخۆشیی تای خوێنبەربوون بریتین لە بەرزبوونەوەی پلەی گەرمیی جەستە، سەرئێشە و خوێنبەربوونی ژێر پێست، هەر کەسێک ئەم نیشانانەی هەبێت با سەردانی دامەزراوە تەندروستییەکان بکات. سەیف بەدر ئەوەشی گوت.

ئەوەی پێویستە بیزانیت: تای خوێنبەربوون نەخۆشییەکی ڤایرۆسییە و لە ئاژەڵەوە بۆ مرۆڤ دەگوازرێتەوە،  63 حاڵەتی تووشبوون بەو نەخۆشییە لە عێراق تۆمار کراوە و 10 لەوانە گیانیان لە دەست داوە.