گرانبوونی غازی ماڵان لە هەولێر و سلێمانی ڕەتدەكرێتەوە

ئاڤا دیجیتاڵ

دوای ئەوەی بەشێک لە میدیاکان و لە سۆشیاڵ میدیا هەواڵی گرانبوونی غازی ماڵان لە هەولێر و سلێمانی بڵاوکرایەوە، قائیمقامی هەولێر و سەرۆکی لیژنە هاوبەشەکانی قایمقامییەتی سلێمانی، ئەو هەواڵەیان ڕەتکردەوە و ئاشکرایان کرد، نرخی غازی ماڵان لە هەرێمی کوردستان جێگیرە و بە هەشت هەزار و 500 دینار دەدرێتە هاونیشتیمانیان.

وێنە گەورەکە: ماوەی چەند ڕۆژێکە دەنگۆی گرانبوونی غازی ماڵان لە سۆشیاڵ میدیا بڵاوکراوەتەوە، بەڵام قائیمقامی هەولێر و سەرۆکی لیژنە هاوبەشەکانی قایمقامییەتی سلێمانی، ئەم دەنگۆیە ڕەت دەکەنەوە  و دەڵێن دوورە لە ڕاستییەوە.

لێدوانە فەرمییەکان: نەبەز عبدولحەمید، قایمقامی هەولێر بۆ ئاڤا میدیا گوتی: بە هیچ شێوەیەک ئەم دەنگۆیە ڕاست نییە، لە هەولێر غازی ماڵان گران نەبووە و بە هەشت هەزار و 500 دیناری عێراقیی دەدرێت بە هاونیشتیمانیان.

هاوکات گۆران قادر، سەرۆکی لیژنە هاوبەشەکانی قائیمقامیەتی سلێمانی، بۆ ئاڤا میدیا گوتی: لە پارێزگای سلێمانی لیژنەیەکی تایبەتمەند بۆ چاودێرییکردنی کارگەکان و غازفرۆشان دانراوە کە غازی ماڵان بە  هەشت هەزار و 500 دیناری عێراقیی بە هاووڵاتییان بفرۆشن، بەپێچەوانە سزا دەدرێن.

ژمارەکان وادەڵێن: لە سلێمانی ڕۆژانە 15 هەزار بوتڵ غاز بە شوێنە گشتی و تایبەتەکان و ماڵان دەفرۆشرێت، کە 22 کارگە لە سلێمانی هەن و بەرپرسن لە دابینکردنی غاز بۆ ناوچەکە.

ئەوەی پێویستە بیزانیت: ماوەی چەند ساڵێکە لە هەرێمی کوردستان نرخی غازی ماڵان جێگیر کراوە.