زانیاریی نەبیستراو لەبارەی گۆڤەند و گرووپەكەی و شێوازی كارەكانی

ئاڤا نیوز

ئاسایشی هەرێمی کوردستان، گرووپە مەترسیدارەکەی گۆڤەندی “ CTS” لە دەرەوەی وڵات دەهێنێتەوە بۆ ناو کوردستان و لەگەڵ باندەکەی دەستگیریان دەکات.

وێنە گەورەکە: گۆڤەند بەر لە شەش ساڵ لە یانەکی شەوانەی شاری هەولێر دەست بە کارەکانی دەکات، ماوەیەک لەو یانەیە پەیوەندی لەگەڵ چەندین کوڕ و کچ دروست دەکات کە سەردانی ئەو یانەیە دەکەن.

چیرۆکی سەرەکی: بەر لە پێنچ ساڵ گۆڤەند هەرێمی کوردستان جێدەهێڵێت و دەچێتە تورکیا و ماوەیەک لەوێ نیشتەجێ دەبێت، هەر لەتورکیا تەواوی ئەکاونتەکانی خۆی لە تۆڕە کۆمەڵایەتییەکانی  دادەخات و دەست دەکات بە دروستکردنی گروپی تێلیگرام و بەدوایدا گروپێک لە ئاپی کڵەپ هاوس دروست دەکات.

 

زانیاریی زیاتر: بەو ئەرشیفە ڤیدیۆییەی لای بووە ژمارەیەکی زۆری خەڵک لە گرووپەکانی کۆدەکاتەوە و لەتۆڕە کۆمەڵایەتییەکان دەبێتە ناوێکی ناسراو، پاشان لەرێگەی ئەو ڤیدیۆیانەی کە لای هەبوون ژمارەیەک کوڕ و کچ دەبنە نێچیری ئەو بەمەرجی بڵاونەکردنەوەی ڤیدیۆکانیان کاری بۆ دەکەن.

باگکراوند: گۆڤەند ناوێکی دورستکراوە، ناوی ڕاستەقینەی ( لای ئاڤا پارێزراوە) و  لە ساڵی 1993ی شاری هەولێر لە لەدایکبووە.

گۆڤەند چۆن دەستگیرکرا؟

هەفتەی پێشوو ڕۆژی سێشەممە 11- 6-2024، لە ئۆپەراسیۆنێکی تایبەتدا،  بە هاوکاری پۆلیسی ئینتەرپۆل گۆڤەند و پێنج کەسی دیکەی ئەندامی گرووپی”CTS” دەستگیران، کە بەشێکیان لە ناو هەولێر بوون و بەشیکی دیکەشیان لە دەرەوەی وڵات دەستگیران،  ئەم گرووپە تۆمەتبارن بە 150  تاوانی ئەلیکترۆنی.

مەترسییەکان بەم شێوەیە بوون

 گۆڤەند و ئەندامانی گرووپەکەی لەماوەی  زیاتر پێنج ساڵی ڕابردوودا لەڕێگەی چەند گرووپێکی تێلیگرامەوە نزیکەی  500 ڤیدیۆ و وێنەی نەشیاوی کچان و کوڕانی هەرێمی کوردستانیان بڵاوکردبووەوە، جگە لە هەڕەشە کردن لە سەدان کچی دیکە بە ئابڕوو بردن و بڵاوکردنەوەی نهێنییەکانیان.

تۆمەتبارە بە هۆکاری خۆکوشتنی چەندین کچ

گۆڤەند لەلایەن دادگەی هەرێمی کوردستانەوە تۆمەتبارە بە نزیکەی 150 تاوانی ئەلیکترۆنی و هاک و هەڕەشە و پارە وەرگرتن لەژێر باری هەڕەشەدا، جگە لە تۆمەتباربوونی بە هۆکاری خۆکوشتنی چەندان کچ لەترسی بڵاوبوونەوەی وێنە تایبەتەکانیان.

شێوازی ئەنجامدانی تاوانەکانی گۆڤەند چۆن بووە؟

 گۆڤەند دوای دەسکەوتنی وێنە و ڤیدیۆی نەشیاوی قوربانییەکان، بە دوو مەرج بڵاوی نەکردوونەتەوە، یەکەم لە ڕێگەی هەژمارێکی تایبەتەوە پارەیەکی زۆری لە قوربانییەکان وەرگرتووە، دووەم قوربانییەکانی کردووەتە ئەندامی گرووپی”CTS” بۆ ئەنجامدانی تاوان.