عێراق ناوی دامەزراوان بڵاودەکاتەوە و بەشێک لە دەرچووانی زانکۆکانی کوردستانیش دەگرێتەوە

ئاڤا نیوز

حکومەتی عێراق لە ماوەی کەمتر لە مانگێکدا ناوی سەرجەم دەرچووانی دامەزراو بڵاودەکاتەوە، دامەزراندنەکە  دەرچووانی زانکۆکانی کوردستانیش دەگرێتەوە.

وێنە گەورەکە: ئەمساڵ هەزاران دەرچووی زانکۆکان لە عێراق فۆرمی دامەزراندنیان پڕکردووەتەوە، دامەزراندن سێ یەکەمی زانکۆکان،  هەڵگرانی بڕوانامەی ماسته‌ر و دکتۆرا و دەرچووانی بەشە پزیشکییەکان دەگرێتەوە.

 

لێدوانی فەرمی: سەعد ئه‌للامی، بەرپرسی ڕاگەیاندنی ئەنجوومەنی ڕاژه‌ی فیدراڵی به‌ ئاڤا نیوز گوت؛ پرۆسەی وردبینیکردن بۆ فۆرمە پێشکەشکراوەکان تەواوبووە،  لە  یه‌كشه‌ممه‌ی داهاتووه‌وه‌ دەست بە ڕاگەیاندنی ناوەکان دەکرێت و  تاوەکو 15-7-2024 دەخایەنێت.

ئەوەی پێویستە بیزانیت: بەگوتەی سەعد ئه‌للامی، دامه‌زراندن دەرچووانی زانكۆكانی هەرێمی کوردستان  ده‌گرێته‌وه‌ به‌و مه‌رجه‌ی دانیشتووی ناوچه‌كانی ده‌ره‌وه‌ی هه‌رێم بن به‌ ناوچه‌ جێناکۆکەکانیشه‌وه‌، به‌ڵام به‌هیچ شێوه‌یه‌ك دانیشتووانی هه‌رێمی كوردستان ناگرێته‌وه‌.

 

زانیاریی زیاتر:  کێبڕکێی دامه‌زراندن بۆ یه‌كه‌می زانكۆكان بەپێی بەرزترین نمره‌ ده‌بێت. بۆ هه‌ڵگرانی بڕوانامەی ماستەریش بەپێی پێویستی وەزارەتەکانه. سەبارەت به‌ پیشە پزیشکییەکان دامەزران بەپێی یاسای ژمارە 6ی ساڵی 2000 ده‌بێت، بەپێی داواكاری وەزارەتی تەندروستی.