ئەم هەفتەیە سایلۆی قوشتەپە بە فەرمی گەنمی جوتیاران وەردەگرێت

ئاڤا نیوز

بڕیارە لەم هەفتەیەدا، پرۆسەی وەرگرتنی گەنمی جووتیاران لە سایلۆی قوشتەپە دەستپێبکات و ڕێکارەکانی تەواو کراون.

لێدوانی فەرمی: هێمن سەید موراد، بەڕێوەبەری گشتی کشتوکاڵی هەولێر بە ئاڤا نیوزی گووت: "کارەکانی سایلۆی قوشتەپە لە کابینەی نۆیەمی حکومەتی هەرێم تەواوکراوە، ئێستا بەشێوەیەکی تاقیکاری ڕۆژانە بڕێک گەنم وەردەگیرێت، بەڵام ناوەڕاستی ئەم هەفتەیە بەفەرمی سایلۆکە دەکرێتەوەو پرۆسەی وەرگرتنی گەنم خێرا دەبێت".

ئەوەی پێویستە بیزانیت: سایلۆی ستیلی قوشتەپە یەکێکە لە 10 پڕۆژە ستراتیژیەکانی حکومەتی هەرێمی کوردستان، بەگوژمەی 20 ملیار و 500 ملیۆن دینار لە قەزای قوشتەپە دروستکراوە، توانای هەڵگرتنی زیاتر لە 40 هەزار تۆن گەنم و جۆی هەیە.

بۆچی گرنگە: تا ئەمڕۆ یەکشەممە زیاتر لە 60 هەزار تۆن گەنمی جوتیارانی سنووری پارێزگای هەولێر لە سایلۆکان وەرگیراوە، چاوەڕوان دەکرێت بەکردنەوەی سایلۆی قوشتەپە، پرۆسەی وەرگرتنی گەنمی جوتیاران خێراتر بێت.

باکگراوند: قوشتەپە دەکەوێتە بەشی باشووری شاری هەولێر، لە 22-5-2023 فەرمانی بە قەزابوونی دەرچووە.