سعودیە: زیاتر لە هەزار و 300 حاجی گیانیان لەدەستداوە

ئاڤا نیوز

 

حكومەتی سعودیە ڕایگەیاند، لە وەرزی حەجی ئەمساڵ زیاتر لە هەزار و 300 حاجی گیانیان لەدەستداوە، كە %83 یان بە ڤیزەی جۆراو جۆر گەشتی ئەو وڵاتەیان کردووە.

 

وێنە گەورەکە: ئەمساڵ زیاتر لە یەک ملیۆن و 800 هەزار کەس بۆ بەجێگەیاندنی فەریزەی حەج سەردانی سعودیەیان کردبوو، بەشێک لەوانەی لە ڕێگەی ڤیزەی ساڵی و جۆراو جۆرەوە گەشتی ئەو وڵاتەیان کردبوو گیانیان لەدەستدا.

 

ڕاگەیێنراوی فەرمی: فەهد بن عەبدولڕەحمان جەلاجل، وەزیری تەندروستیی سعودیە ڕایگەیاند: ژمارەی ئەو کەسانەی لە وەرزی حەجی ئەمساڵ گیانیان لەدەستداوە گەیشتە هەزار و 301 کەس، 83٪یان ئەو حاجییانەن کە هەڵگری ڤیزای جۆراو جۆر بوونە.

 

زانیاریی زیاتر: وەزیری تەندروستیی سعودیە کە بۆ ئاژانسی هەواڵی سعودیە قسەی کردووە، ئاماژەی بۆ ئەوە کردووە "ئەو حاجیانەی بێ مۆڵەت هاتوون، پابەند نەبوون بە هۆشیاری و ڕێگەی دوورو درێژیان بڕیوە بێ ئەوەی شوێنی مانەوەیان هەبێت، ئەمەش بووەتە هۆی ئەوەی تووشی فشاری گەرما و نەخۆشی درێژخایەن ببن.

 

لە لایەکی دیکەوە: بە گوتەی وەزیری تەندروستی ئەوانەی گیانیان لەدەستداوە، بەهۆی ئەوەی ناسنامەیان پێ نەبووە، کاتی ویستووە  تاوەکو بناسرێنەوە.