دوای لە زاوزێخستن; سەگە بێلانەکان بۆ دەرەوەی شار دوور دەخرێنەوە

ئاڤا نیوز

 

تا ئێستا زیاتر لە نۆ هەزار سەگی بێلانە لە پەناگەی سەگە بێلانەکانی هەولێر کۆکراونەتەوە، بەڵام دوای پڕۆسەی لەزاوزێخستنیان (خەساندن) هەموویان دوور دەخرێنەوە بۆ دەرەوەی شارەکان.

 

وێنە گەورەکە: دوای زۆربوونی سکاڵای هاووڵاتییان لە زۆربوونی سەگی بێلانە، ساڵی ڕابردوو لەسەر بودجەی پارێزگای هەولێر، پەناگەی هەولێر بۆ ئاژەڵە بێلانەکان دروست کراوە. 

 

لێدوانی فەرمی: ژیار جەلال بەڕێوەبەری خزمەتگوزاری و ژینگەپارێزیی هەولێر بە ئاڤا نیوزی گوت: لە 11 مانگی ڕابردووەوە تا ئێستا نزیکەی نۆ هەزار و 500 سەگ کۆکراونەتەوە، لەو ژمارەیە تەنیا هەزار و 500 سەگ لە پەناگەکە ماونەتەوە، ئەوانی دیکە لە زاوزێ خراون و لە شوێنی دوورەدەستی ئاوەدانی گەڕێنراونەتەوە ناو سروشت.

 

زانیاری زیاتر: لە پەناگەی هەولێر بۆ ئاژەڵی بێلانە، ڕۆژانە پێنج سەگ لە زاوزێ دەخرێن، بەڵام ژیار جەلال دەڵێت، ئەو پڕۆسەیە زۆر بە سستی بەڕێوە دەچێت.

 

ئەوەی پێویستە بیزانیت: بە گوێرەی ئاماری نەخۆشخانەی فریاکەوتنی ڕۆژئاوای هەولێر، لە پێنج مانگدا 236 حاڵەتی گازگرتنی سەگ تۆمار کراوە، ئەمە لە کاتێکدایە ساڵی پار بە تێکڕا 703 حاڵەت تۆمار کرابوو.