سەرۆکوەزیران بارزانی سایلۆی قوشتەپەی کردەوە

ئاڤا نیوز

سەرۆکوەزیران بارزانی ڕایدەگەیێنێ، لە گفتوگۆ و پەیوەندی بەردەوامدان لەگەڵ حکومەتی فیدراڵ تاوەکو گەنمی جووتیاران بە ڕێژەیەکی بەرچاو وەربگیرێت.

وێنە گەورەکە: سەرۆکوەزیران بارزانی، لە ڕێورەسمێکی تایبەتدا، بە ئامادەبوونی ژمارەیەک لە جووتیارانی دەڤەرەکە، سایلۆی قوشتەپەی لە  سنووری پارێزگای هەولێر کردەوە. 

ڕاگەیێنراوی فەرمی: سەرۆکوەزیران بارزانی، لە گوتەیەکدا ئاماژەی بە گرنگی دروستکردنی سایلۆکان کرد وەک بەشێک لە کارنامەی حکومەت لە بواری گرنگیدانی تایبەت بە کەرتی کشتوکاڵ، جووتیاران، کارکردن لەپێناو دابینکردنی ئاسایشی خۆراک و ساخکردنەوەی بەرهەمی جووتیاران.

زانیاریی زیاتر: بە ئاماژەکردن بەوەی کشتوکاڵ بنەما و شادەماری ئابووری هەرێمی کوردستانە و دەیانەوێت جووتیاران دڵنیابن لەوەی بەرهەمەکانیان بەفیڕۆ ناچێ، سەرۆکوەزیران جەختی کردەوە حکومەت بە هەموو شێوەیەک پشتیوانیان دەبێت.

ئەمەش بزانە: سایلۆی قوشتەپە بە تێچووی 21 ملیار و دووسەد و 76 ملیۆن و 835 هەزار دینار دروست کراوە و توانای هەڵگرتنی چل هەزار تۆن گەنم و دانەوێڵەی هەیە.