سەرۆکوەزیران بارزانی بەنداوێک دەکاتەوە و لەبارەی ئاوی ژێرزەوی هۆشداری دەدات

ئاڤا نیوز

سەرۆکوەزیران بارزانی لە کاتی کردنەوەی بەنداوی چەمرگە لەبارەی کەمبوونەوەی ئاوی ژێرزەوی هۆشداری دا و ڕایگەیاند، خەریکە بە ڕێژەیەکی مەترسیدار دەچێتە خوارەوە، بۆیە پێویستە سوود لە ئاوی سەرزەوی وەربگیرێت.

 

وێنە گەورەکە: ئەمڕۆ سێشەممە سەرۆکوەزیران بارزانی لە ڕێوڕەسمێکدا بەنداوی چەمرگەی لە سنووری قەزای قوشتەپەی سەر بە پارێزگای هەولێر کردەوە و بەشەکانی بەنداوەکەی بەسەرکردەوە.

 

ڕاگەیێنراوی فەرمی: سەرۆکوزیران بارزانی لە گوتەیەکدا ڕایگەیاند: "لە کابینەی نۆیەمدا گرنگییەکی زۆر بە بابەتی پاراستنی سامانی ئاو و دروستکردنی بەنداو و پۆند دراوە، چەند پڕۆژەیەکمان لە سەرتاسەری کوردستان جێبەجێکردوون و بەردەوامیش دەبین".

 

زانیاریی زیاتر: سەرۆکوەزیران بە جەختکردنەوە لەوەی زۆر گرنگە سوود لە ئاوی سەرزەوی وەربگیرێت و ئاوی ژێرزەوی زۆر بەکارنەهێنرێت گوتی: "سامانی ئاو و سامانە سروشتییەکان تەنیا هی ئێمە نین، بەڵکو هی نەوەکانی داهاتووشن، بۆیە دەبێ پارێزگارییان لێ بکەین". 

 

ئەمەش بزانە: بەنداوی چەمەرگە بە گوژمەی چوار ملیار و 300 ملیۆن دینار لە سەر بودجەی حکومەتی هەرێمی کوردستان، بە توانا و شارەزایی ناوخۆیی و بەپێی پێوەر و ستانداردە جیهانییەکان دروستکراوە، بەرزی بەنداوەکە 17.5مەتر و درێژییەکەشی 262مەترە.