قوباد تاڵەبانی: هیچ پاساوێک بۆ دواخستنی هەڵبژاردن نەماوە

ئاڤا نیوز

ڕۆژێک پێش کۆبوونەوەی مەکتەبی سیاسیی یەکێتیی لەسەر تاوتوێکردنی وادەی هەڵبژاردن، قوباد تاڵەبانی لەگەڵ وەفدێکی نەتەوە یەکگرتووەکان کۆبووەوە و جەختی لە بەڕێوەچوونی هەڵبژاردن کردەوە.

وێنە گەورەکە: سبەی چوارشەممە 26-06-2024 مەکتەبی سیاسیی یەکێتیی کۆدەبێتەوە، بڕیار لەسەر وادەی پێشنیازکراوی هەڵبژاردن دەدات، کە تاکە لایەنی سیاسیی هەرێمی کوردستانە لەسەر وادەکە خۆی یەکلایی نەکردووەتەوە.

لێدوانی فەرمی: قوباد تاڵەبانی، جێگری سەرۆکوەزیرانی هەرێمی کوردستان لە کاتی کۆبوونەوە لەگەڵ کلاودیۆ کۆردۆن، جێگری نوێنەری تایبەتی سکرتێری گشتی نەتەوەیەکگرتووەکان لە عێراق بۆ کاروباری سیاسی و هاریکاریی هەڵبژاردن، ئاماژەی بەوەدا "هیچ بیانوو و پاساوێک نەماوە بۆ دواخستنی زیاتری وادەی هەڵبژاردن و کۆمسیۆنی باڵای هەڵبژاردنەکانی عێراق ئامادەکاری تەواوی کردووە".

ئەوەی پێویستە بیزانیت: بڕیارە ئەمساڵ هەڵبژاردنی خولی شەشەمی پەرلەمانی کوردستان بکرێت، پێشنیاز بۆ سەرۆکی هەرێمی کوردستان كراوە، ڕۆژێک لە مانگی 10 بۆ بەرێوەچوونی دیاری بکات.