وەزارەتی ناوخۆ: ئەمساڵ فراوانتر کار لەسەر دانانی کامێراکانی تیژڕۆیی دەکەین

ئاڤا دیجیتاڵ

وەزارەتی ناوخۆ ئەزموونی دانانی کامێراکانی تیژڕۆیی لە هەولێر بە "سەرکەوتوو و دەستکەوتێکی گەورە" دادەنێت، بۆیە بەنیازە ئەمساڵ هەمان سیستەم بۆ سەرتاسەری هەرێمی کوردستان فراوان بکات.

بۆچی گرنگە: بەپێی داتا فەرمییەکان، دانانی کامێراکانی تۆمارکردنی تیژڕۆیی لە هەولێر بووەتە هۆی کەمبوونەوەی 50%ی ڕووداوە ساختەکانی هاتووچۆ و رێژەی مردن و برینداربوون، سەرەڕای کەمبوونەوەی زیانێکی ماددی زۆر.

لێدوانی فەرمی: د. هێمن میرانی، بەڕێوەبەری گشتیی دیوانی وەزارەتی ناوخۆ لە لێدوانێکی تایبەتدا بە ئاڤا نیوزی ڕاگەیاند: "کاریگەریی کامێراکانی تۆمارکردنی تیژڕۆیی لەسەر ڕووداوەکانی هاتووچۆ، ساڵی ڕابردوو لە هەولێر ئەزموونێکی زۆر سەرکەوتوو بوو".

زانیاری زیاتر: وەک هێمن میرانی باسی کرد، بەپێی داتاکانی بەڕێوەبەرایەتیی تەندروستی هەولێر بەتایبەت لە نەخۆشخانەی فریاکەوتنی ڕۆژئاوا، نزیکەی 50%ی ڕووداوە سەختەکانی هاتووچۆ کە گیانلەدەستدان یان برینداربوونی سەختی لێکەوتووەتەوە، کەمبوونەتەوە.

هەنگاوی داهاتوو: وەزارەتی ناوخۆ پلانی هەیە ئەمساڵ ئەزموونی هەولێر بۆ سەرتاسەری هەرێمی کوردستان بگوازێتەوە و فراوانتریشی بکات؛ واتە کامێرای زیاتر لە پارێزگاکانی سلێمانی و دهۆک و هەڵەبجە، ئیدارە سەربەخۆکانی گەرمیان، ڕاپەڕین، سۆران و زاخۆ دادەنرێن.