سوودانی پێشوازی لە بڕیاری سەرۆکایەتیی هەرێمی کوردستان دەکات

ئاڤا نیوز

 

سەرۆکوەزیرانی عێراق پشتیوانی خۆی بۆ ئەنجامدانی هەڵبژاردنی پەرلەمانی کوردستان دووپات دەکاتەوە و پێشوازی لە بڕیاری سەرۆکایەتیی هەرێمی کوردستان دەکات.

 

وێنە گەورەکە: دوای چەندجارێک دواخستن، چوارشەممە 26-6-2024 نێچیرڤان بارزانی، سەرۆکی هەرێمی کوردستان دوای گفتوگۆیەکی زۆر لەگەڵ سەرجەم لایەنەکان، پێنجەم مەرسوومی لەبارەی هەڵبژاردنی خولی شەشەمی پەرلەمانی کوردستان دەرکرد.

 

ڕاگەیێنراوی فەرمی: نووسینەگەی سەرۆکوەزیرانی عێراق ڕایگەیاند: محەممەد شیاع سوودانی، سەرۆکوەزیرانی عێراق پێشوازی لە بڕیاری سەرۆکایەتیی هەرێمی کوردستان دەکات بۆ دانانی وادەیەک بۆ بەڕێوەچوونی هەڵبژاردنی پەرلەمانی کوردستان لە مانگی تشرینی دووەم.

 

خاڵی ئەرێنی: سوودانی پشتیوانی خۆی بۆ ئەنجامدانی هەڵبژاردن بۆ پەرلەمانی هەرێمی کوردستان دووپات کردەوە.

 

ئەمەش بزانە: دڵشاد شەهاب، گوتەبێژی سەرۆکایەتیی هەرێمی کوردستان چوارشەممە 26-6-2024 لە کۆنگرەیەکی ڕۆژنامەوانیدا ڕایگەیاند: "بڕیار درا بە دیاریکردنی ڕۆژی 20-10-2024 بۆ ئەنجامدانی هەڵبژاردن".