ئەنجوومەنی پشتیوانیی پارێزگای هەڵەبجە بۆ سەرۆکوەزیران: بەڵێنەکانت بە کردار دەبینن لە هەڵەبجە جێبەجێ دەکرێن

ئاڤا نیوز

 

ئەندامانی ئەنجوومەنی پشتیوانیی پارێزگای هەڵەبجە سەردانی سەرۆکوەزیران بارزانییان کرد و داوای تەواوکردنی ڕێکارەکانی بەپارێزگابوونی هەڵەبجەیان کرد.

 

ڕاگەیێنراوی فەرمی: لە کۆبوونەوەیان لەگەڵ سەرۆکوەزیران بارزانی، ئەندامانی ئەنجوومەنی پشتیوانیی پارێزگای هەڵەبجە ژمارەیەک داواکارییان لەپێناو باشتر خزمەتکردنی خەڵکی پارێزگای هەڵەبجە خستەڕوو کە سەرەکیترینیان تەواوکردنی ڕێکارەکانی بەپارێزگابوونی شارەکەیان بوو لەلایەن حکومەتی فیدراڵییەوە. هەروەها سوپاسی هەوڵ و پشتیوانی سەرۆکوەزیرانیان لەگەیاندنی دەستی ئاوەدانی و خزمەتگوزاری بە هەڵەبجە کرد و ڕایانگەیاند "بەڵێنەکانی هەمووی لەسەر ئەرزی واقیع و بەکردار دەبینن کەلەهەڵەبجە جێبەجێ دەکرێن".

 

خاڵی ئەرێنی: سەرۆکوەزیران بارزانی دووپاتی کردووە، خزمەتکردنی هەموو کوردستان و بەتایبەتیش هەڵەبجە وەک سیمبولی قوربانیدانی خەڵکی کوردستان، بە ئەرکی سەرەکیی خۆیان دەزانن و هەرچی لە توانایاندا بێت، لەپێناو خزمەتکردنی زیاتری شارەکە دەیکەن. 

 

زانیاریی زیاتر: حکومەتی هەرێمی کوردستان، وەکو پارێزگایەک مامەڵە لەگەڵ هەڵەبجە دەکات و سەرۆکوەزیران بارزانی ئەوەشی گوت، لەگەڵ حکومەتی فیدراڵ و ئەنجوومەنی نوێنەران لە پەیوەندیی بەردەوامدایە تاوەکو ڕێکارەکانی بەپارێزگابوونی هەڵەبجە تەواو بکەن.