کیژان ئیبراهیم خەیات: ئەرکی دایکایەتی و هونەر سەختە

ئاڤا نیوز

 

کیژان ئیبراهیم خەیات لە دیمانەیەکی تایبەتیدا بۆ ئاڤا نیوز باسی لە نوێترین کاری هونەری خۆی و ئەرکی دایکایەتی دەکات.

 

ئاڤا نیوز: نوێترین بەرهەمی هونەرمەند کیژان ئیبراهیم خەیات چییە؟

کیژان ئیبراهیم خەیات: ئێستا سێ بەرهەمی نوێم هەیە کە بە شێوەی دەنگ تۆمارکراون, بەڵام هێشتا کاری ڤیدێۆ کلیپیان بۆ نەکراوە، یەکێک لە کارەکانم ناوی 'مەست'ە کە بە بادینی گوتوومە، خۆم ئاوازم بۆ داناوە و ئەدیب چەلکی تێکستی گۆرانییەکەی نووسیوە, میوزیکەکەی دڵزار عابدی دایناوە. هەریەک لەو دوو کارەی دیکەم یەکێکیان بە شێوەیەکی میوزیکی مۆدێرن میوزیکی بۆ کراوە لەلایەن سوهراب جول و ئاوازەکەی زرێ سەردار دایناوە کە خوشکەزای خۆمە، یەکێکی دیکە لە کارە نوێیەکانم گۆرانییەکەی باوکمە 'دڵم هەر ئەو دڵەی جارانە' کە بە مەقام باوکم گوتوویەتی, بەڵام من بە ئاوازێکی نوێ دەیڵێم و ئاوازەکەی لەلایەن هێرش عومەر ڕەزاوە بۆ دانراوە و کاری میوزیکی لەلایەن  دلێر حوسەینەوە بۆ کراوە.

 

ئاڤا نیوز: ئەرکی دایکایەتی ڕێگری لە کارە هونەرییەکانت نەکردووە؟

کیژان ئیبراهیم خەیات: ئەرکی دایکایەتی ئەرکێکی سەختە بۆ هەر دایکێک ئەگەر هونەریشی لەپاڵدا بێت بێگومان سەختترە، پێویستە هاوسەنگی ڕابگیرێت لە نێوان هونەر و خێزان دا، ئەگەر ئەو هاوسەنگییە نەکرێت لاسەنگ بێت لایەک کورتهێنانی دەبێت بۆیە هەمیشە دەبێت لەو نێوەندەدا خەریکی ڕاگرتنی باڵانس بین.

 

ئاڤا نیوز: پاڵپشتی هاوسەرکەت و خانەوادەکەت بۆ تۆ چۆنە لەکاتێکدا ئەرکەکەت سەختە؟

کیژان ئیبراهیم خەیات: هاوسەرەکەم هاوکارە کاتێک کاری هونەری دەکەم، ئەو ئاگاداری منداڵەکان دەبێت، پێشتریش کە لە کوردستان بووم دایکم و خوشکەکانم هاوکاربوون.

 

ئاڤا نیوز: پەیامی هونەریت چییە بۆ ئاڤا؟

کیژان ئیبراهیم خەیات: پەیامی هونەریم بۆ ئاڤا ئەوەیە هیوادارم بتوانێت ڕۆڵی گەورە ببینێت لە خزمەتکردنی کۆمەڵگە لەڕووی زانست، هونەر وپەروەردەوە ئەو سێ بوارە زۆر گرنگن بۆ میللەتەکەمان.